Политика
Собранието ја започна расправата за уставните измени

Собранието во средата ја почна расправата за предлогот на Владата со кој се предвидуваат измени во Уставот на Република Македонија.
Пред пратениците беа поставени предлозите за дефинирање на бракот како заедница меѓу маж и жена ограничување на буџетскиот дефицит од три проценти и на јавниот долг од 60 проценти од БДП, промена на називот на Народна банка во Македонска банка, како и редефинирање на Државниот завод за ревизија како уставна категорија.
Со предлозите за измени се предвидува бројот на судии во Републичкиот судски совет да се зголеми од осум на десет, а притоа член на ова тело да не биде министерот за правда, а по жалбите од одлуките на Советот да расправа Уставниот суд. Според најавените измени Уставниот суд добива и уште една надлежност, односно можност да прима уставни жалби од граѓаните.
Дебатата ја отвори министерот за правда, Аднан Јашари, кој појасни дека практиката, континуитет во ЕУ реформите и препораките на ГРЕКО се причина за предложените корекции на клучниот правен акт.
Според него со уставната жалба, како дел од судскиот пакет, се воведува нов механизам во заштита на човековите права и слобооди којшто според првиот човек на ресорот правда, бара и дополнителна законска регулатива.
„Уставната жалба којашто засега не е е дел или пак уставен институт, со овие измени се предвидува да стане посебенуставен институт“, нагласи министерот за правда
Според пратеникот од ВМРО-ДПМНЕ, Илија Димовски, постои потреба од надградба на Уставот, но сепак тоа треба да се прави со широк консензус. Воедно, тој ја повика опозицијата и избраните пратеници кои не доаѓаат на работа во Собранието, да се однесуваат одговорно и во моменти кога се расправа за Уставни измени и значајни државни прашања, личните и партиски интереси да се остават на страна.
Пратеникот Павле Трајанов, од Демократскиот Сојуз, се согласува дека се потребни вакви уставни измени, но потенцира дека за тоа е потребна и широка јавна расправа на која би се слушнале сите аргументи, за и против.
„Да се менува Уставот е одговорна и тешка задача. Треба бројни консултации. Недостасува длабинска анализа, нема компаративни податоци, нема мислења од институции каде што се менуваат областите. Има многу коментари околу функционрање на Судскиот совет и потребата од дополнителни реформи, бидејќи како таков орган не ја гарантира независнота на судството, туку е инструмент за дисциплинирање на судиите. Најспорно е формирањето на финансиски зони без никакво образложение. Во основа, во вакви зони се слеваат средства, капитал од тешки кривични дела. Тоа е пракса во светот. Се надевам дека тоа не е интенцијата на Владата“, истака Трајанов.
Пратеничката на НДП, Мирсада Емина Асани, ја постави дилемата дали кога се отвора Уставот не треба да се даде можност и за измени кои се однесуваат на меѓуетничките прашања.
ДПА веќе најави дека нема да гласа за нова Уставна корекција
Власта очекува уставните измени да го поминат првиот собраниски филтер. Процедурата за измена на Уставот се очекува да трае околу три месеца. Најмалку 82 пратеници треба да дадат согласност дека има потреба да се менува Уставот, по што Владата предлогот треба да го дефинира како нацрт-амандмани.
Потоа следува јавната расправа од 30 дена, по што на седница во Собранието ќе се расправа и гласа за секој предложен амандман одделно./крај/мф/ап
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Политика
Седница на ИО на СДСМ: почнуваат да течат статутарните рокови за организирање нови директни внатрепартиски избори за нов претседател на СДСМ

На 23 седница, Извршниот одбор на СДСМ донесе неколку одлуки и заклучоци. Претседателот на СДСМ, Димитар Ковачевски на седницата го потврди повлекувањето од функцијата Претседател на СДСМ и иницираше свикување отчетен Конгрес.
„Согласно член 68б од Статутот и повлекувањето на претседателот на партијата Извршниот одбор заклучи дека почнуваат да течат статутарните рокови за организирање нови директни внатрепартиски избори за избор на претседател на СДСМ.
Бидејќи избраната Централната изборна комисија согласно Статутот се уште има мандат, во истиот состав ќе ја спроведе постапката за нови непосредни внатрепартиски избори за избор на претседател на СДСМ.
Извршниот одбор ја задолжи Централната изборна комисија врз основа на Статутот на партијата да предложи правилник со предлог роковник за спроведување на директните внатрепартиски избори во текот на месец јуни во транспарентна и демократска постапка.
Извршниот одбор донесе одлука за формирање на Работни групи за активна регистрација на членството за гласање на директните внатрепартиски избори како и за организација на отчетен Конгрес на СДСМ, согласно Статутот.
Членовите на Извршниот одбор, како и членовите на раководството на СДСМ, заменик претседателката, потпретседателите, генералниот секретар, организациониот секретар, секретарот за меѓународна соработка, поднесоа оставки од функциите.
Воедно, согласно поднесените оставки се повикуваат и членовите на Централниот одбор да го следат примерот како морален чин на одговорност.
Со повлекувањето на претседателот на СДСМ, сите претседатели на Општински организации и претседателот на Градската организација се во оставка со глед на фактот дека се именувани од страна на претседателот, а нивната функција ќе ја извршуваат до избор на нови“, се наведува во соопштението на СДСМ.
Македонија
Мециновиќ: На носителите на ЗНАМ, на личните профили им стојат слики со Заев и Пендаровски

– На носителите на ЗНАМ, уште на личните профили им стојат слики за поддршка на Заев и Пендаровски. Тоа се поддршки што јавно им ги дадоа, така што сегашното нивно делување е малку повеќе лицемерно од нивна страна – истакна Носителот на ИЕ2 и портпарол на Левица, Амар Мециновиќ, во дебатата на ,,24 Вести”.
Според Мециновиќ, СДСМ ако ја примеа пораката, немаше Оливер Спасовски да биде носител во ИЕ2, после скандалите со пасошите за белосветски криминалци, за голготата за македонските граѓани со пасошите и за бегството на Груевски:
– Од друга страна, за СДС имам конкретна порака, но СДС не ја прима пораката! Пораката не е примена, затоа што нивниот носител во Двојка имаше страшни резултати. Имаше: од бегството на Груевски до оваа голгота што им се случи со пасошите на граѓаните и во меѓувреме – издавањето на пасоши за белосветски криминалци.
Говорејќи за Францускиот предлог и за ненаситноста кон бизнис – интересите од страна на СДСМ, Мециновиќ рече:
– Исто така, не ја примија ни пораката кога народот го отфрли Францускиот предлог. Не ја примија ни пораката кога Заев го изгуби легитимитетот, така што на сила се одржаа на власт до 2024 год. Практично, за да ги задржат нивните бизнис – интереси.
Мециновиќ постојано става акцент и на неоспорниот факт дека челниците од ЗНАМ го избришаа АСНОМ од Уставот:
,,ЗНАМ го избришаа АСНОМ од Уставот кога го носеа Преспанскиот, со оглед на фактот дека тогаш беа дел од раководството на тогашното СДС. Затоа, целата нивна сегашна реторика е лицемерна”.
Левица е единствена искрена, чесна, неподмитлива опција, која се бори за нулта – корупција, радикални промени во системот и нуди решенија за сите целни групи граѓани во Македонија:
,,На 8 мај, заокружете го број 5! Искористете го своето право на глас и гласајте за Левица! Со повеќе пратеници во Парламентот, борбата ќе биде посилна!”
Македонија
Аваја: Треба да се искористи потенцијалот на ромската заедница

Ромската заедница има најмлада популација во државата и тој потенцијал треба да се искористи, порача Ќемал Сулејманов, носител на листа во Изборна единица 3 на средба со жителите на Криволак.
„Нашата заедница е најмладата популација во државата. И нашите млади бегаат надвор од државата, барајќи решенија, а ние увезуваме работници од азиските држави. Мора да најдеме решение како нашите млади да останат во државата. Заеднички да ги направиме промените иво нашите инситтуции да имаме наши луѓе. Ветуваме дека промените почнуваат со Аваја. Вашиот глас го давате за подобра иднина и соединети да покажеме дека сме тука“ порача Сулејманов.
Според него, доволно е ромската заедница да биде третирана само како чистачи и амалџии „Драги браќа и сестри, ги знам вашите проблеми со кои се соочувате, тие се мои проблеми и мора да засукаме ракави по избори и заедно да ги решаваме. Мора да се сооединиме и да почнеме со промени. Мора да имаме наши луѓе во сите институции и тоа на раководни позиции. Доста не гледаа само како чистачи и нивни амалџии“, рече Сулејманов.
Претседателот на Аваја, Акиф Кариман, рече дека одлучил да ја жртвува индивидуалната кариера за да придонесе кон напредокот на народот. Тој говореше за тоа како другите политичари ги гледаат и вреднуваат Ромите.
„Зошто? Затоа што секогаш не потценуваат. Велат ние знаеме лесно да се справиме со вас. Малку ќе ве преплашиме и вие ќе се повлечете. Ќе ви дадеме под рака и вие ќе бидете на наша страна. Или ако тоа не функционира, ќе почнат со притисоци. И тоа досега функционираше. Но, сега ја имаме Аваја, формирана да биде рамо до рамо со сите нас. Ние сме тука да направиме голема промена и да го предизвикаме статус квото“, порача Кариман.