Претседателот на Државната комисија за спречување на корупцијата, Горан Миленков, си замина од прес-конференцијата во четвртокот и не одговори на новинарските прашања за нефункционалноста на Комисијата и за „бомбите“, односно прислушуваните аудио записи коишто ги објави опозицијата во коишто наводно се слуша дека владини функционери се вмешани во коруптивни скандали.

Миленков на прес-конференцијата зборуваше околу 40 минути за веќе најавениот Регистер на функционери, за нивни средби со претставници на американската амбасада, за обуки во Сараево, а ги измеша и бројките за постапувањето по предмети.На новинарско прашање и забелешка „дали не чувствувате одговорност во време на владина политичка криза кога во сите извештаи се зборува дека е декларативна борбата против корупцијата, вие да земате улога на статиста и на ној која ја става главата во песок“, Миленков одговори дека со тоа што денеска биле повикани сите новинари на прес-конференцијата, Комисијата ја покажувала својата транспарентност и начин на работа. „Тоа другото е Ваша перцепција“, рече Миленков.Тој не сакаше да коментира ниту на прашањето дали Комисијата има поведено постапка за „бомбите“ што ги објавува опозицијата.„Сево ова што го прашавте е во судска процедура и нема да го коментираме“, рече Миленков и замина од средбата со новинарите, иако имаше и други новинарски прашања. Новиот претседател на Комисијата беше избран во април минатата година и ова е втора прес-конференција по конституирањето на новата Комисија и нема досега во својот мандат отворено ниедна постапка за корупција во Македонија./крај/мф/ффс

Извор: Фото:архива