До крајот на 2014 година ќе биде објавен тендер за изградба на втората фаза од железничкото поврзување со Бугарија, за потегот од Бељаковце до Крива Паланка, а истовремено ќе започнaт и подготовките за изградбата на регионален пат од Крива Паланка до Македонска Каменица и експресен пат од Ранковце до Крива Паланка, најави премиерот Никола Груевски кој во неделата престојуваше во општина Крива Паланка
 

До крајот на 2014 година ќе биде објавен тендер за изградба на втората фаза од железничкото поврзување со Бугарија, за потегот од Бељаковце до Крива Паланка, а истовремено ќе започнaт и подготовките за изградбата на регионален пат од Крива Паланка до Македонска Каменица и експресен пат од Ранковце до Крива Паланка, најави премиерот Никола Груевски кој во неделата престојуваше во општина Крива Паланка

Премиерот Груевски појасни дека во тек е реализацијата на првата фаза на потегот од Куманово до Бељаковце во должина од 31 километар, инвестиција којашто чини 40 милиони евра.

„Станува збор за голем проект кој не важен само за Крива Паланка, туку за целата земја и значи поврзување со Бугарија, нешто за што долго се говори и за што во деведесеттите години од минатиот век имаше ветување и некои инвестиции коишто пропаднаа. Се работи за значајно поврзување на Македонија со Бугарија, а за Крива Паланка ќе има поголема вредност, затоа што ќе добие поврзување со Бугарија, со Скопје и со другите региони од земјата кои се железнички поврзани“, рече Груевски.

Додаде дека се очекува во септември идната година да започне изградбата на втората фаза, а за третата фаза во моментот се работат проектите и по нивното завршување ќе започнат и процедурите.

Груевски, исто така, најави и градба на нов експресен и регионален пат до Крива Паланка. Регионалниот пат ќе биде во должина од 17 километри, и за него ќе бидат инвестирани десет милиони евра. Подготовките се во тек и се очекува во втората половина на следната година да започне неговата изградба.

„Овој регионален пат е значаен затоа што ќе бидат поврзани двата најголеми рудници во Македонија за олово и цинк, а ќе бидат поврзани и двата града, Крива Паланка и Македонска Каменица“, рече премиерот Груевски.

Експресниот пат од Ранковце до Крива Паланка, пак, како што рече, е планирано да има четири ленти и да биде со сите карактеристики на автопат, со можност во иднина доколку има поголема фреквенција на возила да се догради уште по една лента од двете страни со што би станал автопат.

„Сега сме во поодмината фаза од подготовки и на крајот од 2015 година се очекува да започне градбата на овој експресен пат кој ќе значи и поврзување со Република Бугарија, нешто за што, како и железницата, во минатото многу често се зборуваше, но сега влегуваме во финална фаза на подготовки за негова реализација“, рече Груевски.

Појасни дека финансирањата на двата проекта се договорени со меѓународните финансиски институции. Експресниот пат ќе се прави со финансиски средства од Светска банка, а регионалниот пат ќе биде финансиски поддржан од Европската банка за обнова и развој. „Станува збор за релативно затворена финансиска конструкција, но потребна е подготовка од аспект на проекти, експропријација и сл.“, истакна Груевски при што додаде дека во моментот се изготвува проектот за експресниот пат кој се очекува да биде завршен до јануари идната година, по што следува шестмесечен период на експропријација на земјиштето, а кон крајот на 2015 и почеток на изградбата./крај/мф/сн

Извор: Макфакс