Голема општинска делегација предводена од градоначалникот на Општина Демир Хисар Љупчо Блажевски, во сабота го започна проектот „Поблиску до граѓаните“.

Покрај претседателот на Советот, Јосиф Ристевски, во делегацијата беа единаесет директори или раководители на скоро сите локални јавни претпријатија и установи, како и советничката Надица Пејковска и директорот на Центарот за социјална работа и раководителот на Центарот за вработување.

Маршрутата долга повеќе од 100 километри, точно напладне започна со посетата на најоддалеченото населено место во општината –  Зашле.

На зашланското средсело делегацијата беше пречекана од поголема група граѓани кои присуството на градоначалникот го искористија да постават прашања, но и да побараат конкретна помош за подобрување на условите за живеење во селото.

Беше посочен проблемот со дефектот на селската јавна чешма, одржувањето на просториите на училишната зграда како и прилагодување на една просторија во училиштето за потребите на медицинскиот тим на руралниот лекар. Најголем проблем, како што рекоа Зашлани, е превозот до општинскиот центар, па побараа од градоначалникот, барем еднаш месечно да сообраќа комбе или минибус.

Втора дестинација беше селото Брезово. Градоначалникот и дел од неговата придружба прошетаа низ селото и низ непосреден разговор со нив, ги слушна нивните проблеми. Исто така градоначалникот Блажевски ја посати Кулата каде што неодамна со финансиска поддршка што ја обезбеди општината беа извршени градежни зафати за нејзина заштита. И Брезовци се пожалија на немањето редовен јавен превоз, па и тие побараа, барем еднаш неделно да се воведи редовна автобуска врска со Демир Хисар.

Во Доленци средбата со бројната делегација главно  беше сведена на прашања од комунална природа, но и недоаѓањето на руралниот лекар. Иако општината обезбеди соодветен простор во училишната зграда, сепак, како што рекоа тие, досега ниту еднаш не дошол руралниот лекар. Доленчани како сериозен проблем го посочија заглотеното корито на Црна Река и предложија конкретни акции за чија реализација ќе помогне и општината.

Бројната општинска делегација од Доленци се упати во Мало Илино. На Малоилинското средсело градоначалникот и неговата придружба беа пречекани од неколкумина Малоилинчани, бидејќи, како што рекоа, се е „лиднато“ по печурки. Но неколкумината со кои се сретна градоначалникот побараа да се уреди селската чешма, да се поправат неколку дефектни сијалични места и други помалку важни комунални проблеми за кои беше речено дека општината заено со селото ќе ги реши.

Во налетот на предвечерието, градоначалникот со својот тим го посети и Големо Илино. Најмногу и речиси цел разговор со Големоилинци беше сведен на проблемот што го создрале изведувачите на миницентралата кои, како што рекоа селаните, цели три недели го имаат блокирано селскиот пат до селото со ископот на каналот за положување на електричен кабел. Биле подготвени, како што рекоа, дури и организирано да се побунат со блокирање на патот бидјќи, како што рекоа, прилично несовесно и неодговорно го узурпираат патот правејќи и големи штети врз коловозната лента со тешката механизација.

Првата маршрута од неколкуте што се планираат наредниве денови беше долга 120 километри, а сите членови на делегацијата возеа приватни возила со приватно гориво.

Проектот „Поблиску до граѓаните“ продолжува и наредниот викенд со посета на други населени места,најави Општината.крај/мф