Претставниците на Црвениот крст од Врњачка Бања остварија средба со конзулот на Република Србија во Република Македонија, Силјан Мицевски, истакнувајќи дека широко е полето за соработка со Битола, со посебен акцент на можноста за соработка во областа на туризмот.

Конзулот Мицевски притоа ја потенцираше можноста за иницијатива за туристичко приближување на двата градови. Тоа би се направило, како што посочи, со анимирање на туристичките агенции преку снабдување со соодветни информации за капацитетите на двете општини со цел да се унапреди туристичката соработка меѓу Битола и Врњачка Бања, а жителите на двата градови да добијат соодветна туристичка понуда.

Со оглед на досегашните резултатите од претходните соработки на Битола со српските организации, пред сè за време на големите поплави кои го погодија подрачјето на Србија во минатите години, претставниците на српската делегација изразија благодарност до српскиот конзул за неговото лично ангажирање да се даде помош. Таквата соработка води и до соработка во други области и зацврстување на пријателските мостови меѓу Македонија и Србија, истакнаа од српската делегација.

„Ние, и како град и како организација, први притекнавме на помош и таа соработка меѓу Црвениот крст од Битола и Црвениот крст од Србија се покажа извонредна, така што, јас се надевам дека таа соработка ќе продолжи и на други полиња“, рече Мицевски.

Претставниците на српската делегација истакнаа дека широко е полето за соработка со Битола, ставајќи посебен акцент на можноста за соработка во областа на туризмот.

„Би сакал да истакнам дека Врњачка Бања е туристичко место, познато и како лекувалиште со 27.000 жители. Имаме пет извори на минерална вода. Имаме голем број хотели и угостителски објекти. Во последните години интензивно се работи на инфраструктурата. Кај нас постои и специјална болница за шеќерна болест која со најсовремени програми лекува пациенти од цел регион. Ние посветуваме и големо внимание на туризмот и изградбата на спортски објекти“, рече Слободан Дишовиќ, секретар на Црвениот крст во Врњачка Бања, додавајќи дека Битола и Врњачка Бања со години соработуваат и затоа тој го покани конзулот да биде гостин на овој град во Србија.

Мицевски на ова возврати дека е добро да се покрене иницијатива за туристичко приближување на двата градови. Тоа би се направило со анимирање на туристичките агенции преку снабдување со соодветни информации за капацитетите на двете општини со цел да се унапреди туристичката соработка меѓу Битола и Врњачка бања, а жителите на двата градови да добијат соодветна туристичка понуда.

На гостите од Србија, конзулот Мицевски им подари примероци од зборниците кои се продуцираат како завршен производ од научниот симпозиум посветен на односите меѓу Македонија и Србија, а кој секога година се одржува во Битола.

„Ние немаме спорни прашања меѓу нашите две држави и меѓу нашите два народи. Но некои луѓе понекогаш шират дезинформации за историјата на Македонија и на Србија. Со цел да ги донесеме работите на вистинското место секоја година организираме научен симпозиум овде во Битола. На последниот симпозиум учествуваа 70 научници од Македонија и Србија. Тие заедно ги дискутираат сите важни прашања. Сите тие трудови се ставаат во зборник во тираж од 300 примероци кои завршуваат во библиотеките и училиштата“, рече конзулот Мицевски.

Српските претставници изразија голема благодарност до конзулот за постојаните напори за одржување на српските гробишта во регионот на Битола. Мицевски, пак, од своја страна истакна дека дополнителни напори се прават во соработка меѓу српскиот и грчкиот конзулат во Битола да се обезбедат средства од европските фондови за реконструкција на патот кој води на Кајмакачалан со цел сите историски важни локации на ова подрачје да станат подостапни за посетителите./крај/мф/аш

Извор: Макфакс