Унгарската национална трговска куќа ги претстави во понеделникот можностите за соработка со бизнисмените од Стопанската комора на северозападна Македонија, со цел проширување на деловната соработка со унгарските фирми или заеднички настап на трети пазари.

Настанот се одржа во просториите на Универзитетот на Југоисточна Европа во Тетово, а пред присутните се обрати министерот за економија Беким Незири.

„Отворањето и постоењето на Унгарската национална трговска куќа во Република Македонија нуди зголемена можност за унапредување на економската соработка меѓу двете земји, преку реализирање на нејзината основна  цел – олеснување на контактите меѓу македонските и унгарските  компании и јакнење на меѓусебната деловната соработка. Во таа насока би сакал да им порачам на бизнисмените максимално да ја искористат оваа прилика и да започнат многу нови успешни зделки со унгарските партнери, а со тоа да воспостават и нови правци на трговската соработка меѓу двете земји“, рече Незири.

На настанот присуствуваше и амбасадорот на Унгарија Јожеф Бенце, кој пред бизнисмените од Полошкиот регион истакна: „Нашите две држави имаат потпишано многу значајни договори од сферата на трговијата, туризмот, економијата. Во месец јули ја отворивме и канцеларијата во Скопје на Унгарската национална трговска куќа, и тоа со огромна поддршка на министерот за економија Незири, но и на Владата во целост. Тетово е еден од најдинамичните градови од економски аспект во Македонија, и имајќи предвид  дека соработката со Македонија, но и со целиот западен Балкан ни е многу битна, очекуваме интензивна соработка помеѓу унгарските и полошките бизнисмени“.

Во името на Унгарската национална трговска куќа пред присутните се обрати Ласло Балог, одговорно лице за балканскиот регион: „Сакаме да бидеме присутни во Македонија и Западен Балкан, бидејќи е многу значаен регион за нас, побитен дури и од Кина и САД. Нашата цел е зголемување на извозот, кој само минатата година имаше раст помеѓу 10-33 отсто во државите кои не се членки на ЕУ. Ова сакаме да го постигнеме преку малите и средни претпријата, затоа ни е битно тие да имаат поголема улога во трговската размена, а тоа може да се постигне само преку поголема соработка помеѓу локалните и унгарските фирми“.

Претседателот на Комората на Северозападна Македонија Мендерес Кучи на фирмите членки на ова деловно здружение им порача: „Ова високо ниво на соработка му недостигало подолго време на Полошкиот регион, а бидејќи нашата комора главно се состои од мали и средни претпријатија, оваа поддршка од Унгарската национална трговска куќа ќе ни биде повеќе од потребна. По потпишувањето на договорот меѓу стопанските комори на Унгарија и Македонија, останува да преминеме на директна соработка помеѓу нашите и бизнисмените од Унгарија.“ /крај/