Скопје
Град Скопје ќе ги донира планираните средства за новогодишната прослава за нов пункт за бездомници
![](https://makfax.com.mk/wp-content/uploads/2017/01/koce-donira.jpg)
Градоначалникот на Град Скопје, Коце Трајановски и претседалелот на Советот на Град Скопје, Ирена Мишева, во средата го посетија Пунктот и Прифатилиштето за бездомни лица, лоциран во Момин Поток им поделија хигиенски пакети, пакети со прехранбени производи и гумени чизми и го најавија новиот проект за проширување на неговит капацитет за кој Градот Скопје ќе ги донира планираните средства за Новогодишната прослава од два милиони денари.
„Сега имаме нов проект од Црвен крст за проширување на капацитетот за сместување на бездомни лица, односно за уште еден контејнер со 16 легла и повеќе туш кабини и јас на следната седница на Советот на Град Скопје ќе предложам средставата во износ од два милиони денари кои беа предвидени за Новогодишната прослава во градот да ги намениме за проширување на капацитетот за сместување на бездомни лица во пунктот во Момин Поток“, истакна градоначалникот Трајановски.
„Градот Скопје во соработка со Црвениот крст на Град Скопје, континуирано го помага работењето на овој центар, а во 2011 година го отвори Прифатилиште за згрижување и привремено прифаќање на лицата бездомници кое овозможува засолниште, дневен престој со оброк, здравствена заштита, услови за одржување хигиена и други психосоцијални услуги. Бездомниците во овој центар добиваат хигиенски услуги, чисти алишта, берберски услуги, лекарски преглед и неопходни лекарства, разговор и совети од психолог и топол оброк. Градот Скопје за набавка на сместувачки капацитети во 2011 година издвои 1.400.000 денари и со отворањето на Прифатилиштето, капацитетите на постојниот Пункт на Црвен крст се зголемија за 60 квадратни метри. Просторот е опремен сo 16 кревети, тоалети, кабина за туширање, чајна кујна и други неопходни средства за функционирање на Пунктот со што може да одговори на потребите на овие лица“, додаде тој.
Пунктот за бездомници на Црвен крст на град Скопје е отворен во 2008-та година, и во текот на работната недела работи во понеделниците кога бездомниците добиваат хигиенски услуги и секој петок кога добиваат и чисти алишта, лекарски преглед и неопходни лекарства, разговор и совети од психолог, оброк и топол напиток. Транспортот на корисниците на услуги на пунктот го обезбедува Црвениот крст и тоа од неколку локации во градот и по добиените услуги, бездомниците повторно се враќаат на истата локација.
Прифатилиштето ги нуди своите услуги и во ситуации кога температурите надвор се многу високи или ниски со цел да се згрижат привремено и да се избегне смртноста кај оваа група на граѓани.
Црвениот крст на град Скопје, со поддршка на Град Скопје и годинава од 30-ти декември 2016-та година, поради екстремно ниските температури им понуди 24 часовно згрижување на бездомниците. Изготвен е логистички план кој вклучува ангажиран тим кој функционира 24 часа и е воедно мобилен и спремен да ги преземе бездомниците од местата каде што се лоцирани. Од неговото отворање па до сега секоја зима во прифатилиштето се реализираат акции за згрижување од студен бран кога се сместуваат во просек 20 лица, а во текот на годината заради болест се згрижуваат во просек 5-10 лица.
Градоначалникот Трајановски им се заблагодари на вработените и на волонтерите во Црвениот крст на Град Скопје за нивната посветоност во помагањето на бездомните лица за да им се подобрат условите на живот и за ангажирањето на едно нивно возило за превоз на бездомните лица до Пунктот.
Секретарот на Црвениот крст на Град Скопје, Сузана Тунева-Пауновска се заблагодари за поддршката на Градот Скопје со помош на која им го олеснуваат животот на бездомните лица.
Бездомниците може да го повикаат тимот од Пункот на телефонскиот број 3139 578 во Дирекцијата на Црвениот крст на град Скопје.
Вкупниот трошок за функционирање на пунктот на годишно ниво изнесува 1.700.000 денари, од кои 500.000 ги обезбедува Град Скопје, а преостанатите се обезбедуваат од буџетот на Црвениот крст на град Скопје, како и од други донатори./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Скопје
Свечено одбележан патрониот празник на општина Илинден, „Илинден 2 Август“
![](https://makfax.com.mk/wp-content/uploads/2024/07/DSC_6298.jpg)
Со пригодна свеченост и настап на музички гости беше одбележан патрониот празник на општина Илинден, „Илинден 2 Август“ и национален празник на македонскиот народ.
На централната манифестација, која се одржа во комплексот на Домот на култура ,,Илинден“, пред присутните се обрати градоначалникот на општина Илинден, Александар Георгиевски, кој во своето поздравно обраќање им го честита празникот на сите жители од општина Илинден.
Градоначалникот воедно изрази голема благодарност до граѓаните на општина Илинден за несебичната поддршка, како и на сите други фактори во нашата заедница: здруженијата на граѓани, бизнис-секторот, благодарност и до членовите на Советот на Општина Илинден, вработените во општинската администрација, вработените во општинските претпријатија, просветните работници од нашите јавни установи, кои даваат особен придонес во развојот на нашата убава општина.
„Токму оваа поддршка ни дава голем поттк за да продолжиме да се развиваме во вистински правец и со уште посилно темпо да создаваме нови проекти, кои ќе значат подобри услови и, генерално, ќе го подобрат животот во Илинден. Успехот на општествата денес зависи од способноста на локалните самоуправи да се приспособуваат на брзите промени во светот и од способноста да ја зајакнат сопствената конкурентност. Во изминатите три години успеавме да покажеме дека Општина Илинден со тоа одлично се справи, а за тоа говорат многуте реализирани проекти и активности во сите области од општественото живеење, како што се комуналната и патната инфраструктура, заштитата на животната средина, образованието и младите, здравството, економијата, спортот, културата и сите други области“, изјави градоначалникот Георгиевски.
На настанот присуствуваа голем број граѓани од општината и пошироко, кои уживаа слушајќи ги познатите хитови на Андријана Јаневска и Александар Тарабунов, како и преубавиот настап на хорот на Здружението на пензионерите „Илинден“.
Скопје
Делегација од Кисела Вода предводена од градоначалникот Ѓорѓиевски положи цвеќе пред Споменикот на жртвите од катастрофалниот земјотресот во Скопје
![](https://makfax.com.mk/wp-content/uploads/2024/07/02-1-1.jpg)
Делегација од Општина Кисела Вода предводена од градоначалникот Орце Ѓорѓиевски денес положи свежо цвеќе пред Споменикот на жртвите од земјотресот во Скопје во 1963 година, на гробиштата во Бутел.
– Секој 26 јули, стоиме заедно, со мисли и срца полни со почит и незаборав кон оние кои ги загубивме во катастрофалниот земјотрес што го погоди нашиот главен град пред точно 61 година. Овој споменик не само што го чува споменот за жртвите, туку и не потсетува на силата и издржливоста на нашиот град и на сите негови граѓани. По катастрофата, Скопје повторно се изгради, а ние, како општество, покажавме дека можеме да се издигнеме од пепелта и да продолжиме напред со обновена енергија и решителност.
Денес, додека положуваме цвеќе пред овој споменик, ветуваме дека ќе продолжиме да се сеќаваме на нашите загинати сограѓани. Нивната жртва нема да биде заборавена, а нашата обврска е да направиме се што е во наша моќ вакви трагедии никогаш да не се повторат. Работиме на зголемување на безбедноста и подготвеноста на нашиот град, за да обезбедиме иднината на следните генерации. Нека овој ден биде потсетник за нашата заедничка одговорност и нека не обедини во нашата цел да создадеме побезбедна и посигурна иднина за сите нас-изјави градоначалникот Орце Ѓорѓиевски
Скопје
Отворен спортско-рекреативен центaр на Теферич во чест на момчето за кое прерано згасна животот, Александар Ивановски
![](https://makfax.com.mk/wp-content/uploads/2024/07/02.jpg)
Градоначалникот Орце Ѓорѓиевски синоќа заедно со министерот за спорт Борко Ристовски, го отвори спортскиот центар во Теферич, Припор, кое го носи името на момчето за кое прерано згасна животот, Александар Ивановски. Во негова чест, настанот започна со едноминутно молчење. Новиот спортско-рекреативен центар се протега на околу 800 квадратни метри. Со градежниот зафат, тој доби ново осветлување, детско катче и урбана опрема, фудбалско игралиште со вештачка трева, а обезбедени се и паркинг места. Припор не смее да биде заборавено место како што било во минатото, истакна во своето обраќање градоначалникот Орце Ѓорѓиевски, кој додаде дека наскоро започнува рекострукција на игралиштето во ПОУ “Круме Кепески” и дека во моментот активно се работи на обнова на улиците во ова населено место.
–Александар Ивановски, ова малечок е во твоја чест! Денес, заедно со министерот за спорт Борко Ристовски го отворивме спортскиот центар во Теферич, Припор, кое име го носи на момчето за кое прерано згасна животот, Александар Ивановски. Младо момче, наш сограѓанин и другар, ученик и син за кого животот само што требаше да започне…Нека ти е вечна слава! Твојот спомен засекогаш ќе остане врежан во нашите срца! Обично ваквите настани ги започнуваме со аплауз, но сега, оддаваме почит со едно минутно молчење. Во негова чест.
Почитувани, Припор, како што знаете, е едно од местата кое беше заборавено од моите претходници, но тој третман останува таму, во минатото. Ние, во изминатиот период се потрудивме и сѐ уште силно работиме на рамномерен развој како за Припор, така и за останатите населби. Поддршката од припорчани сум ја имал секогаш и затоа го давам својот максимум да ги исполнам очекувањата и барања на мојот народ. Така е и со овој спортски центар во Теферич, кој доби ново осветлување, детско катче и урбана опрема, вештачка трева за фудбалското игралиште, како и паркинг места. Така ќе биде и со игралиштето во подрачното училиште каде што никој шајка нема заковано со години, игралиште на кое му е потребна реконструкција и таму започнуваме со работа. Моментално работиме и на реконструкција на повеќе улици овде во Припор и се трудам максимално да одговорам на сите ваши потреби за кои во минатото никој немал слух. Заедно со вас, во иднина ќе направиме уште повеќе. Го имате мојот збор.
Нека е аирлија, а јас и понатаму ќе продолжам со работа и само работа за поквалитетен живот на мојот народ-изјави градоачалникот Орце Ѓорѓиевски.