Градоначалникот Орце Ѓорѓиевски, денес, присуствуваше на почетокот на градежните активности за проширување и реконструкција на дел од градинката „Пеперутка 1“ во Драчево. Во овој објект, каде што се сместени јаслите и кој не е реконструиран повеќе од 50 години, секојдневието го поминуваат 90-ина дечиња. При посетата градоначалникот информира и за досегашните вложувања во предучилишното образование, отворањето на двете нови градинки во Усје и Драчево и најави изградба на уште една градинка во Расадник.

„Денес, почнуваме со реализација на проектот за проширување и реконструкција на дел од градинката ‘Пеперутка 1’ во Драчево, конкретно делот на јаслите, каде што 50-ина години не се извршени речиси никакви реконструктивни зафати. Се работи за простор во кој денот го минуваат 90-ина дечиња. За два месеца, колку што ќе траат градежните активности, тие ќе добијат квалитетни услови за престој, што е наша стратешка цел – и во оваа градинка и во сите други на територијата на општината Кисела Вода. Оттука, ќе потсетам дека во дворот на објектот ‘Кокиче’, чиј капацитет неодамна го проширивме за уште 90 дечиња, почнуваме со изградба на сосема нов објект ‘Верверичка’. Во овие две години отворивме две нови градинки, едната во Драчево и втората во Усје, а пред само неколку дена објавивме и дека се обезбедени финансиски средства за изградба на уште една нова градинка во Расадник.

За нашата посветена работа во насока на унапредување на условите на нашите најмлади, говорат и инвестициите во опрема на сите предучилишни образовни објекти на нашата територија со дидактички материјали, мебел, опрема, а за што издвоивме околу 17 милиони денари.

Доволен број градинки со квалитетни услови, соодветно опремени за да обезбедат позитивен детски развој се насоката кон која се движиме во целиот овој период. Имено, кога станав градоначалник на наследените листи за чекање имаше над 400 деца, сега таа бројка е двоцифрена, а тенденцијата е вакви листи воопшто да нема, што набргу ќе биде реалност. Предучилишниот период е многу значаен и претставува темел во формирањето на личноста на секој поединец, па наша обврска како локална самоуправа и моја како градоначалник е да овозможиме секое дете да може да го оствари ова право“, изјави градоначалникот Ѓорѓиевски.