Од Здравствениот дом – Скопје информираат дека во текот на утрешниот ден (15 јули), кој е прогласен за неработен поради одржувањето на предвремените парламентарни избори, дежурните ординации за здравствена заштита ќе функционираат во согласност со вообичаениот распоред за работа за недела и празници.

Во трета смена ќе работат ординациите во поликлиниките: Јане Сандански, Чаир, Ченто, Шуто Оризари, Ѓорче Петров, Драчево и на Бит-пазар.

Службата за итна медицинска помош со домашно лекување ќе се грижи за здравствената состојба на граѓаните во текот на 24 часа, а со вообичаено работно време ќе функционира и единицата за домашна посета.

ЈП „Водовод и канализација“ – Скопје апелира до граѓаните за рационално користење и употреба на водата, односно да се избегнува полевање поголеми површини и непотребно трошење на водата за време на топлите денови.

Воедно, велат од таму, со цел заштита на системот за водоснабдување, граѓаните кои регуларно и редовно ги извршуваат своите обврски кон претпријатието, како и во согласност со сите законски регулативи, се спроведуваат акции за исклучување на диви приклучоци.

Дивите приклучоци се забранети со закон и истите се утврдуваат од страна на овластен комунален инспектор на општината и на Градот, врз основа на што за сите утврдени иматели на див приклучок ќе биде покрената прекршочна постапка за сторено кривично дело.

Во ек на пандемијата од Ковид-19, изнемоштените и стари лица кои живеат на територија на општина Карпош можат да добијат бесплатна нега и грижа.

Тимот на социјалното претпријатие „Нега плус“ ја овозможува оваа поддршка преку Проектот на УСАИД за граѓанско учество. Граѓаните можат да добијат некоја од следните услуги, пријавувајќи се на телфонскиот број 070 – 299 – 026 – подготовка на храна; пазарење; помош при одржување на основна хигиена во домот; помош при пресоблекување; бањање.