Нов сообраќаен режим на булеварот Борис Трајковски, на преминот преку железничката пруга кај  населбата Усје каде што е поставена нова патна и железничка сигнализација, се воведува од вторник.

На денешната презентација на новата сигнализација која ќе овозможи безбедно одвивање на сообраќајот преку железничката пруга присуствуваа градоначалникот на Град Скопје, Коце Трајановски, директорот на Македонски железници-Инфраструктура, Ирфан Асани и градоначалникот на општината Кисела Вода, Билјана Беличанец-Алексиќ.

„Вградувањето на овој систем е резултат на добрата соработка на Градот Скопје со Македонски железници-Инфраструктура, Македонски железници-Транспорт и Цементарницата „Усје“. На терен, во изминатиов период беа поставени светлосни сообраќајни знаци за означување премин на патот преку железничка пруга во ниво и полубраници за затворање на сообраќајот на преминот преку железничката пруга во ниво. Претходно овој премин беше регулиран физички, со знаменца, а сега преминот е обезбеден со рампи и целосна сигнализација со што во голема мера  ќе  се зголеми безбедноста во сообраќајот“, рече градоначалникот Коце Трајановски.

Според него, ова е еден од најсложените системи за регулирање на сообраќајот во Македонија, со оглед на тоа што овој премин е единствениот каде што железничка пруга поминува низ крстосница регулирана со семафори.

„Настојуваме оваа крстосница да стане дел и од Центарот за управување и контрола на сообраќајот за да се овозможи дополнителна контрола и мониторинг“, додаде Трајановски.

На терен работеа екипи од ЈП „Улици и патишта“, Цементарница „Усје“ и од Македонски железници. /крај/со/мф