Градоналаничката на Град Скопје, Данела Арсовска е во коалиција со СДСМ, а плод на коалицијата е директорот на ЈСП кој е кадар на владејачката партија. Ваков е ставот на портпаролот на ВМРО-ДПМНЕ, Наум Стоилковски кој во таа насока рече и дека премиерот Димитар Ковачевски јавно признал дека имал средби со Арсовска.

„Александар Стојковски, директорот на ЈСП поставен од Данела Арсовска е кадар на СДС. Ова е фотографија од која се гледа Стојковски на партиските состаноци во централниот штаб на СДС“, рече Стоилковски.

„Заедничкиот интерес на таквата коалиција се тендерите и договорите во 4 очи. Зошто ЈСП троши повеќе нафта од тоа што трошеше со повеќе автобуси од пред 8 години? Зошто фирмата на владиниот пратеник е победничката на милионскиот тендер за набавка на нафта за ЈСП? Одговорите ги крие коалицијата Арсовска – Ковачевски, кои што се одговорни за хаосот“, рече Стоилковски.

ВМРО-ДПМНЕ ја обвини Арсовска дека го заглавила градот во долгови, неподмирени обврски и во проблеми, а еден од нив е и застојот во јавниот превоз.

„Додека делат тендери, Арсовска и Ковачевски ги ставија приватните превозници на милост и немилост, а скопјани со нарушен јавен превоз. Скопје е блокирано, а скопјани заглавени во сообраќаен хаос, и тоа е вина само на СДС и на Данела Арсовска. Очигледно е зошто ВМРО-ДПМНЕ ја повлече својата поддршка за Арсовска. Никогаш нема да поддржиме некој кој тргнува во коалиција со криминалци за правење на матни зделки“, рече Стоилковски.

По повод Меѓународниот ден на лицата со попреченост, градоначалникот на Кисела Вода, Орце Ѓорѓиевски, во својот кабинет се сретна со децата со попреченост од училиштето „Кузман Шапкарев“ од Драчево.
Покрај дружбата, Ѓорѓиевски потсети и на сè што е направено за нив претходната година.

„Овие мали душички, дечињата со попреченост од училиштето ‘Кузман Шапкарев’ од Драчево, денес ми беа гости во мојот кабинет.

Дојдоа со своите родители да се дружиме и да се заблагодарат што по неколку децении некој имал слух за нив, за сензорната соба што ја изградивме и која значително им го олеснува и подобрува процесот на образованието.

Јас сум почестен и, секако, секогаш среќен со ваквите дружби бидејќи овие дечиња за мене секогаш се на првото место.
Во мене имаат другар, но и поддршка и партнер!

Тоа е евидентно од сето она што е реализирано досега и поставено како план за периодот пред нас.
Нашите средби се чести и ги користиме и за дружење, но и за евидентирање на разните потреби што овие лица ги имаат.

На Меѓународниот ден на лицата со попреченост, кој во својата суштина го има надминувањето на предрасудите, маргинализацијата и дискриминацијата, ќе потсетам на многуте проекти што ги реализиравме.

Поставивме пристапна рампа на влезот на Општина Кисела Вода, со што буквално ги отворивме вратите за лицата со посебни потреби, со книги напишани на Брајово писмо ја опремивме библиотеката на дечињата со оштетен вид од ДУРМДОВ „Димитар Влахов“, отворивме клуб во Расадник за деца со церебрална парализа, кој целосно го финансираме, воспоставивме соработка со младинската организација „Крик“ и со наша поддршка во просториите на УЗ „Црниче“ е отворен дневен окупационен центар за лица со попречености.

Покрај ова, им реализиравме и екскурзии, а воедно работиме на нивна целосна инклузија, вклучувајќи ги лицата со попречености во сите наши активности од културно-уметнички карактер и во сите други сфери во кои сме процениле дека би им било интересно и едукативно.

Континуитетот на обезбедување достапност, правичност и сигурност е насоката што општина Кисела Вода ја зацрта и по која ќе се движи и во годините што се пред нас.

За нив, јас сум секогаш тука за сè што е потребно!“, рече Ѓорѓиевски.

Денес, во салата за состаноци на Советот, на пригодна свеченост, градоначалникот Горан Герасимовски ја додели годишната награда на Општина Центар – „Феникс“ за 2022 година.

Годинава признание добија десет ученици и студенти што се истакнале во разни спортски дисциплини: во стопанството, уметноста, образованието, како и во други области на трудот и творештвото и покажале исклучителни резултати на натпреварите.

„Добивањето награда е причина за задоволство не само за оние што ја примаат туку и за оние што ја доделуваат. Како градоначалник на општина Центар сакам да ви оддадам признание за тоа што покажавте како со успех може да се спојат училишните обврски, умешноста и знаењето. Вашите постигнувања веќе се пример за врсниците, но и за повозрасните“, им порача Герасимовски на победниците.

Тој им посака на младите со ист интензитет да продолжат да го надградуваат својот талент преку училишните клупи, на спортските терени, во просторот на уметноста.

За своите постигнувања, диплома и паричен износ од 16.000,00 денари добија:

– Петар Ацевски, за постигнувања во спортот – фудбал
– Ева Малиновска, за постигнувања во културата – музика
– Ана Левеска, за постигнувања во науката – биологија
– Кристијан Јанев, за постигнувања во спортот – тенис
– Стефан Новковски, за постигнувања во спортот – тенис
– Теона Димитриевска, за постигнувања во класичниот балет
– Марио Брезовски, за постигнувања во спортот – триатлон
– Мила Христовска, за постигнувања во музиката
– Петар Бошку, за постигнувања во образованието и
– Лука Дворник, за постигнувања во спортот – пинг-понг