Скопје
Усвоен буџетот на Град Скопје за 2016 година – за власта развоен, за опозицијата расипнички
Советот на Град Скопје на својата 56-та седница одржана во вторник го усвои Предлог-буџетот на Град Скопје за 2016 година.
Буџетот на Град Скопје за 2016 година изнесува 6,9 милијарди денари, што претставува зголемување од 16 проценти во споредба со Буџетот на Град Скопје за 2015 година. Основниот буџет на Град Скопје за 2016 година изнесува 4.798.816.000 денари.
„Станува збор за буџет кој е правен во транспарентна постапка за потребите на град Скопје и неговите жители. Станува збор за развоен буџет со голем број капитални проекти и инвестиции кои значително ќе го подобрат животот на жителите на град Скопје. Со него се опфатени проекти во сите области на општеството: урбанизмот, сообраќајот, образованието, екологијата, културата, спортот, енергетската ефикасност, промоција на туризмот во Скопје“, изјави градоначалникот Трајановски во неговото обраќање пред советниците.
Советниците од опозицијата сметаат дека станува збор за расипнички буџет и дека не се решаваат реалните потреби на скопјани, особено не проблемот со загадувањето на воздухот.
„Само за нови барокни фасади Коце Трајановски планира да потроши нови 5,7 милиони евра. За нови плоштади и фонтани уште дополнителни 3 милиони евра. А само за одржување на фонтаните и спомениците уште 500 илјади евра. За Градската куќа следната година ќе се потрошат нови 2,6 милиони евра. Врв на забеганоста, безобразлукот и луксузирањето се 500 илјади евра за пристапни површини околу гламурозното партиско седиште на ВМРО-ДПМНЕ“, рече Дамјан Манчевски, советник од редовите на СДСМ.
Градоначалникот Трајановски истакна дека со овој буџет се предвидени капитални проекти во сите 10 општини на Градот Скопје.
Во Општина Сарајпредвидена ереконструкција на главната улица Сарај и улици, сообраќајници во Глумово, додека во Општина Ѓорче Петров ќе биде продолжен булевар Партизански одреди до кружниот тек кај црквата „Свети Петар и Павле”.
Во Општина Карпош ќе се инвестира во изградба на кружен тек кај Хубо Маркет, на бул. 8 Септември, додека во Центар ќе биде проширен дел од булеварот Тодор Александров и ќе биде реконструирана улицата Кеј Димитар Влахов, како дел од плоштадот Пресвета Богородица.
За Кисела Вода се предвидуваат реализација на третата фаза од проектот за проширување и реконструкција на булевар Борис Трајковски на потегот од фабриката „Стакларница“ кон населбата Драчево, потоа продолжување на булевар Србија до улица Христо Татарчев, каде што ќе се изгради голема кружна крстосница, а ќе биде реконструирана и проширена улица Павел Шатев.
Во Општина Аеродром предвидено е завршување на втората фаза од проектот за проширување и за реконструкција на булевар Трета Македонска бригада, на потегот од крстосницата со улицата Васко Карангелевски до улицата Никола Карев, делница долга 1.400 метри. Предвидено е и проширување на булевар АСНОМ – Изградба на булевар АСНОМ во делот на Керамидница до новата сала Јане Сандански и изградба на дел од булевар АСНОМ од последна 5-ка кон куќите во Лисиче прва фаза.
Во Гази Баба ќе заврши првата фаза од проектот за проширување и реконструкција на улица Маџари, а ќе се доизгради и кружниот тек помеѓу улиците „16. Македонска бригада и „Коце Металец“ во Гази Баба, на влезот во населбата Железара.
Покрај тоа, ќе биде проширен булеварот Александар Македонски од Агросервис до клучка Дијамант.
Почеток на градежни работи за реконструкција и проширување на булевар Христијан Тодоровски Карпош во делот на Чаир, почеток на проектот за изградба на 4-та лента на булевар Никола Карев (Пластичарска) и изградба на атмосферска канализација на улица Џон Кенеди и Кемал Ататурк, е предвидено за Општина Чаир.
Во Бутел ќе почне пробивањето на булевар Христијан Тодоровски Карпош и поврзување со обиколницата, додека во Шуто Оризари ќе финишира изградбата на новиот водовод. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Муцунски: Аеродром го заслужува најдоброто, започнува реализацијата на голем капитален проект
Градоначалникот на Општина Аеродром, заедно со претседателот на советот, Дејан Митески и директорката на основното училиште „Блаже Конески“ утрово на работен состанок ја утврдија динамиката по која до крајот на оваа школска година треба да започне реконструкцијата и доградбата на основното училиште „Блаже Конески“.
„Станува збор за важен инфраструктурен проект, онаков каков што заслужуваат граѓаните на Аеродром. По неговото финализирање, Аеродром ќе добие модерно и современо училиште, направено согласно сите европски стандарди, училиште кое ќе биде пример за квалитетна градба, одржливост и енергетска ефикасност“, истакна градоначалникот Муцунски во својата објавата на Фејсбук.
Тој додаде дека најважно од се е што реконструкцијата и доградбата нема да го наруши нормалното функционирање на училишните активности, а нивната организација ќе биде направена во консултација и согласно барањата на родителите, со кои утрово Муцунски одржа состанок.
Скопје
Герасимовски: Со видео надзор, општината ќе ја зголеми безбедноста на граѓаните и ќе ги заштити јавните добра
Советот на Општина Центар на 35. Седница на советот го прифати предлогот на градоначалникот Горан Герасимовски во општина Центар да се постави видео надзор.
Станува збор за видео надзор поради обезбедување заштита на имотoт и имотните права на општината односно Заштита на урбаната опрема (автобуски постојки, опрема во функција на туристички и културни и спортски настани, самостоечки рекламни паноа, детски игралишта, фонтани, чешми, клупи, корпи за отпадоци и други согласно законите), Заштита на инфраструктурните објекти (улици, плоштади и други инфраструктурни објекти во надлежност на Општината), Заштита на сообраќајни знаци и семафори и друга вертикална и хоризонтална сигнализација, Заштита на улична јавна осветлување, броење и евиденција на возила за статистички мерења.
Герасимовски во образложението за дополнувањето на дневниот ред истакна дека одлуката е преземена и модифицирана од други општини во кои веќе неколку години има поставен видео надзор и каде по поставувањето има намалување на штетите во општината.
„Се обидовме да ја заштитиме урбаната опрема особено детските игралишта но по сите напори не успеваме да го направиме тоа. Тие не ни траат ниту два месеци, се кршат детските реквизити, обрачите на спортските игралишта, се крши се. Затоа овие снимки може да служат како доказ за нечие дивеење. Но Министерството за внатрешни работи или Јавното обвинителство, исто така ќе може да ги користат при евентуално сторено кривично дело, нарушување на јавен ред и мир, или кршење на друга урбана опрема. Верувам дека снимките ќе ја зголемат и безбедноста во општината. Суштината е снимката да се користи како доказ за евентуална судска кривична или прекршочна постапка со цел да имаме намалување на девијантните појави во општината“, рече Герасимовски на седницата.
Скопје
Градоначалникот Георгиевски на увид во реконструкцијата на игралиштето за мал фудбал во Текија, општина Илинден
Увид во работните активности за реконструкција на игралиштето за мал фудбал во рамки на подрачното општинското основно училиште во населено место Текија направи градоначалникот на општина Илинден, Александар Георгиевски.
Како што истакна градоначалникот Георгиевски и на ова фудбалско игралиште целосно ќе биде обновен асфалтниот слој, проширување на теренот, ќе биде поставено лед осветлување, обновување на заштитната ограда, а ќе бидат поставени нови голови, клупи, корпи за отпадоци, просторот ќе биде партерно уреден. Со обновувањето на игралиштето ќе се создадат услови за реализација на часовите по физичко образование како и комплетно реконструиран, убаво уреден простор каде младите во спортски дух ќе го поминуваат слободното време, соопшти општина Илинден.
Покрај реконструкцијата на игралиштето за фудбал ќе се обнови и детското игралиште во рамки на училиштето, односно оштетените реквизити ќе бидат заменети со нови.
Со цел уредување на секое населено место како и создавање квалитетни и безбедни услови за жителите, општина Илинден продолжува со реконструкција на постоечките и изградба на нови спортски терени и во останатите населени места, се наведува во соопштението.