Жителите на Карпош 4 од Скопје, бараат од општината да ги пренамени средствата предвидени за новиот плоштад во нивната населба кој треба да се протега на површина од 2.900 м2, во вредност од 18,8 милиони, кон настраданите од катастрофалните поплави во општините Гази Баба и Илинден.

„Ние жителите на Карпош 4, ги повикуваме градоначалникот и останатите општински власти, во име на големината на оваа општина, како во својата територија, така и во хуманоста на нејзините жители, да ги пренаменат средствата предвидени за оплеменување на овој простор во населбата Карпош 4 кон настраданите од катастрофалните поплави во општините Гази Баба и Илинден“, велат жителите на Карпош 4.Сметаат дека голем дел од граѓаните на Карпош, иако сакаат да помогнат преку донации или со директна вклученост, сепак не се во можност истото да го направат од различни причини, но бидејќи нивни пари се слеваат во општинската каса, од таму и треба да се донира.„Ние како жители на Карпош 4, ќе се задоволиме и со обична табла на која пишува дека децата од Карпош 4 се откажале од ново игралиште во име на хуманоста. Нашите деца се свесни дека многу нивни другарчиња и врсници веќе немаат топол и сув дом, а преку ваквата несебичност ќе научат и ќе дадат пример за тоа што значи да се биде вистински хуман“, велат карпошани.Исто така, побараа општинските власти итно да свикаат седница на советот, на која ќе биде разгледан нивниот предлог за кој тие се подготвени да соберат и потписи.„Дополнително, доколку општината тоа сѐ уште го нема направено, ја повикуваме веднаш да ја отстапи сета расположлива механизација и да ја стави во владение на град Скопје и Центарот со управување со кризи, како истата би се упатила да помогне во загрозените подрачја. Граѓаните на Карпош се познати по својата хуманост и знаат да направат приоритети кога тоа е потребно. Сега е време да се подаде рака на оние кои изгубиле буквално сѐ“, велат карпошани.Предлагаат и општината да ги потсети сите компании со кои соработува и кои изведувале работи на нивна територија дека во овие моменти е најбитно да се покаже општествена одговорност и дека исклучително важно да се помогне на граѓаните од загрозеното подрачје. „Бараме општината преку допис и јавен повик, да ги замоли и тие да позајмат дел од својата механизација и дел од својот кадар на ЦУК, со што би помогнале побрзо да се санираат последиците од оваа елементарна непогода“, велат жителите на Карпош 4./крај/со/бб