Секојдневно полицаецот докажува дека е човек кој зад униформата не ја крие својата човечност, зад штитот не ја крие својата правичност, а зад шлемот не го крие разумот, порача министерот за внатрешни работи, Оливер Спасовски, на одбележувањето на Денот на полицијата, 7 мај, што се одржа во петок во касарната „Илинден“ во Скопје.

„Вие најдобро знаете, дека да се биде припадник на полициските сили никогаш не е лесна задача. Полесните задачи,  биле за некои други луѓе, за некои други професии.  Оваа професија  бара многу сериозност, одговорност, подготвеност и пожртвуваност.  Денес, како никогаш до сега  Вие сте под огромен притисок. Секој ден од почеток да  избирате  помеѓу одговорноста и прагматичноста, помеѓу достоинството и егзистенцијата, помеѓу храброста и исплатливоста“, порача Спасовски. Според него, без праведни одлуки, нема добар полицаец, a добар полицаец не значи само физички јак, одлично обучен и совршено опремен професионалец. „Тоа не е доволно.  Добар полицаец значи и совесен човек, добар сопруг, грижлив татко, почитуван комшија и пред се општествено одговорен граѓанин.  Нашиот народ  полицаецот, често сака да  го гледа како херој, како миротворец и  спасител. Тоа може да ви создава притисок, да бидете што поблиску до тој стереотип, ама  Вие и навистина многу често ги исполнувате нивните очекувања. Затоа сум многу горд што најголем дел  од Вас ја оправдаа довербата што ја имав во Вас  кога влегов во министерскиот кабинет“, порача Спасовски. Тој потсети дека покрај Денот на полицијата се прославува и 35-годишен јубилеј од формирањето на единицата за специјални задачи.„Во изминативе месеци се уверив дека во министерството за внатрешни работи има многу квалитетни, стручни и чесни професионалци, многу добри луѓе. Како што всушност ги имало одсекогаш во генерациите што оставиле неизбришлива трага во развојот на македонската полиција, во децениите зад нас. Има и  многу, многу храбри луѓе, спремни силно да се спротистават на неправдата, гласно да кажат не  на секој кој се обидува да ги манипулира и користи како  статисти во туѓи сценарија“, рече Спасовски.Порача дека знае оти полицајците се исправени пред многу предизвици, непријатни ситуации, дилеми и конфузии, што ги создаваат оние кои најмалку тоа треба да го прават.

„Исто така знам дека има и многу отворени и нерешени парашања во врска со условите во кои работите, во врска со наградувањето и напредувањето кое вас ве исцрпува и ви одзема дел од енергијата.   Длабоко сум уверен дека ние заедно  ќе можеме да најдеме одговори  за многу досега нерешени прашања“, рече министерот.Тој им го честита Денот на македонската полиција, и 35-годишниот јубилеј на припадниците на единицата за специјални задачи, и порача, да не забораваат дека – „луѓето што стојат на оваа говорница  се менуваат ама  довербата на граѓаните на оваа држава во сината униформа што ја носите е нешто што се гради макотрпно со генерации и трае многу подолго од еден министерски мандат“./крај/со/бб