Македонија
Во ДИК одбиен и третиот приговор на СДСМ

Сите девет членови, вклучително и од опозициските социјалдемократи, на Државната изборна комисија (ДИК) длабоко во ноќта кон петокот го одбија и третиот приговор на опоициската СДСМ.
Ваквата одлука ја донесоа членовите на ДИК по увидот на гласачката кутија од шестата изборната единица, откако СДСМ вложи приговор поради наводни нерегуларности во пребројувањето на гласовите.
Членовите на Државната изборна комисија изгласаа дека треба да биде направен увид во изборниот материјал од гласачкото место 2.024 и откако увидот беше направен, беше утврдено дека ВМРО ДПМНЕ и Коалицијата за подобра Македонија освоиле 64 гласа, СДСМ и Коалицијата за живот во Македонија освоиле 48 гласа, Движењето БЕСА – 48 гласови, ДПА – 35 гласа, а Алијансата за Албанците -19 гласови.
На овој начин се утврди дека состојбата со освоените гласови на партиите е идентична со записникот број 16 од ова избирачко место. Утврдено е дека има 14 неважечки ливчиња, а неупотребени се 212.
Со тоа одбиени се вкупно три од осумте приговори на СДСМ за текот на гласањето и за постапката на утврдување и на сумирањтое на гласовите од предвремените парламентарни избори кои се одржаа на 11-ти декември.
Државната изборна комисија претходно ги отфрли двата приговора на СДСМ, за избирачките места во општината Теарце, исто така, во шестата изборна единица. Приговорите за овие избирачки места се однесуваат на преправани записници како и несовпаѓање на бројките на гласачите со распределбата на гласовите.
Претходно во четвртокот ДИК отфрли седум приговори од Движењето БЕСА, а само еден приговор беше оставен за да се однесе потписот на Фатиме Сулејмани на графолошко вештачење за да се потврди дали потписот е веродостоен или друг се потпишал наместо неа.
Роковите според избрниот законик беа до 24 часот во четвтокот, а потоа течат и роковите за жалби пред Управниот суд.
Пред седиштето на ДИК во текот на целата ноќ има силно полициско обезбедување и голема група поддржувачи на владејачката ВМРО-ДПМНЕ, кои порачуваат дека нема да дозволат „да им биде украдена победата“ на изборите на 11-ти декември.
На масата ѝ се обратија повеќе функционери и кандидати за пратеници од владејачката партија, кои повикаа „да се почитува волјата на избирачите“ и порачаа дека ќе останат и натаму пред ДИК, сé додека не бидат потврдени првично соопштението резултати од изборите според кои коалицијата предводена од ВМРО-ДПМНЕ освоила 51, а коалицијата на СДСМ 49 пратенички мандати./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по влажни коловози. Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Сиљановска Давкова: Не сум се фотографирала со восочни фигури на Доналд и Меланија Трамп

Фотографијата објавена на моите официјални профили на социјалните мрежи, на којашто сум заедно со претседателот на САД, Доналд Трамп, е автентична и направена во Њујорк за време на свечениот традиционален прием организиран од претседателот Трамп и неговата сопруга, Меланија Трамп, реагираше претседателката на државата Гордана Сиљановска – Давкова.
– Написите на одредени медиуми дека станува збор за фотографија со восочна фигура се целосно неточни, злонамерни и со јасна тенденција за дискредитација, вели таа.
Сиљановска – Давкова упати апел до медиумите за професионално, одговорно и чесно информирање на јавноста, со почитување на вистината како највисок демократски принцип.
Македонија
Денес дожд и температура од 13 до 21 степен

Времето во текот на денот се очекува да биде претежно облачно со повремени врнежи од дожд, наместа пообилни, проследени со ретки грмежи.
Според синоптичарите, ќе дува слаб со умерен ветер од југоисточен правец. Минималната температура ќе биде во интервал од 8 до 15, а максималната ќе достигне од 13 до 21 степен Целзиусов.
Во Скопје, се очекува претежно облачно со повремени врнежи од дожд. Според најавите, ќе дува слаб до умерен јужен ветер. Минималната температура ќе се спушти до 14, а максималната ќе достигне до 19 степени Целзиусови.
Локални врнежи од дожд се најавени и за утре, а потоа во следните два дена да биде претежно стабилно.
Од четврток се очекува нов влажен и постуден бран со пообилни врнежи од дожд и со значително опаѓање на температурата.