Македонија
Претседателката на Косово ја инаугурира улицата Ибрахим Ругова во Чаир
Во општина Чаир денеска свечено беше инаугурирана улицата што го носи името на историскиот претседател на Република Косово, Ибрахим Ругова, а претседателката на Република Косово, Вјоса Османи-Садриу, како и Теута Ругова, ќерката на претседателот Ибрахим Ругова, учествуваа на инаугурацијата на улицата. Во оваа пригода градоначалникот на општина Чаир, Висар Ганиу, во својот говор потсети дека оваа улица се наоѓа во една од најстарите населби и многу блиску до скопското Кале.
„Денес го олицетворуваме историскиот претседател на Република Косово, доктор Ибрахим Ругова, именувајќи една од улиците на главниот град на нашата земја по него. Во Скопје, каде што често доаѓаше и наоѓаше гостопримство во овдешните семејства. Ибрахим Ругова, токму ова име ќе стои во личните документи на стотици граѓани на општина Чаир. Ова е најмалото нешто што ние можеме да го направиме за некој како доктор Ибрахим Ругова, човек кој до последниот момент од својот живот дишеше за Косово, конкретно и за Албанците воопшто. Тој беше идеолошкиот архитект, кој со својата мирољубива филозофија ја дизајнира иднината на Косово како независна држава, со вистинска дипломатска соработка со Соединетите Американски Држави и земјите од Европската Унија“, рече Ганиу.
Тој ѝ се заблагодари на претседателката Вјоса Османи за честа што му ја направи на Скопје, поточно на Чаир, потсетувајќи дека името на Ибрахим Ругова ќе стои заедно со 66-те нови имиња, кои неодамна се поставија на улиците на општина Чаир.
Претседателката на Косово, Вјоса Османи-Садриу, пак, рече дека за Чаир засекогаш ќе биде чест што на оваа улица го овековечува името на претседателот Ругова и дека оваа табла со ова име е патоказ не само за улицата туку и за делото на претседателот Ругова.
По инаугурацијата на улицата Ибрахим Ругова, косовската претседателка Вјоса Османи ја посети и Старата скопска чаршија, каде што се сретна со локалните еснафи, а заедно со Ганиу положи цвеќе кај споменикот на Скендербег и на Хасан Приштина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Отфрлени се тужбите на „Европскиот фронт“ од Уставниот суд, ќе има прегласување
До доцна во ноќта Уставниот суд расправаше по тужбите на одлуките на Државната изборна комисија – ДИК за неколку избирачки места поднесени од коалицијата „Европски фронт“. Од судот соопштија за шест одлуки според кои тужбите се отфрлени како неосновани, а тоа значи, согласно одлуките на ДИК, дека ќе има прегласување на конкретни избирачки места.
„Европскиот фронт“ имаше поднесено седум тужби на одлуките на ДИК, а Управниот суд беше ограничен со роковите за нивно решавање.
Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица.
Според Изборниот законик, доколку одлуката за прегласување на едно избирачко место може да влијае на конечните резулатите од изборите, ДИК ќе организира повторно гласање 14 дена од одржувањето на изборите, односно на 22 мај.
Македонија
Фирма од Чаир монтира небезбедно панорамско тркало во Карпош, обвини Град Скопје
Град Скопје информира дека правното лице Дизниленд реквизити, фирма од Чаир регистрирана пред само еден месец, без соодветни документи и дозволи, без потребна документација која гарантира безбедност, монтира панорамско тркало и останати реквизити во Карпош пред Борис Трајковски.
„Град Скопје, во рамки на своите надлежности изврши надзор, превзема мерки и го казни правното лице, но тој сепак насилно продожува да работи. Ги повикуваме надлежните институции и апелирам да постапат во најкус можен рок, бидејќи се доведува во прашање безбедноста на децата и на сите останати посетители поради практицирањето на ваквото самоволие“, велат од таму.
Македонија
Вработен во МВР фатен со мито од 12.500 евра
Вработен во Министерството за внатрешни работи е фатен со мито од 12.500 евра, соопшти министерот Панче Тошковски. Како што вели тој, лицето И.М. било вработено како виш аналитичар во СВР Скопје. Осомничениот е лишен од слобода под сомневање за сторени кривични дела измама предвидени по чл. 247 од КЗ.
„Од страна на Одделот за внатрешна контрола, криминалистички истраги и професионални стандарди во координација со Одделот за криминалистичка полиција се постапуваше по пријава од три оштетени лица и на ден 17.05.2024 година наведеното лице е фатено на лице место во моментот на примопредавање на 12.500 евра, претходно криминалистички обработени кои ги прибавила за наводно посредување за добивање на социјални станови од Б категорија. Во врска со кривичното дело извршен е претрес во службените простории кои ги користела пријавената при што е пронајдена пообемна сомнителна документација која е поврзана со кривичното дело во вид на разни документи за кои постои сомневање дека се фалсификувани, разни договори за позајмици, договори за посредување за доделување на социјални станови, имотни листови, како и тефтер со ракопис во кој е водена евиденција за лица за кои биле вршени определени работи“, соопшти Тошковски.
При извршен претрес во дом и други простории кои ги користи лицето И.М. лоцирани во Општина Сарај, беше пронајдено и огнено оружје со шест парчиња муниција кое оружје и муниција најверојатно ги поседува без дозвола, за што известено е и Одделението за недозволена трговија со оружје при СВР Скопје заради преземање на дополнителни мерки.
Министерот додава дека МВР и понатаму продолжува со преземање на мерки и активности насочени кон испитување на евентуална поврзаност на наведеното лице со други високи полициски службеници.