Спорт
Луда вечер во ЛЕ, Марсеј и Салцбург одат понатаму, а се „тресеа“ Арсенал и Атлетико (видео)
Иако се веруваше дека четврт-финалињата од Лигата на Европа се „речиси“ одлучени по првите мечеви минатата недела, неверојатна вечер во второто по квалитет европско натпреварување, донесе изненадувања во Франција и Австрија, но и „тесни“ моменти за гол…
Иако се веруваше дека четврт-финалињата од Лигата на Европа се „речиси“ одлучени по првите мечеви минатата недела, неверојатна вечер во второто по квалитет европско натпреварување, донесе изненадувања во Франција и Австрија, но и „тесни“ моменти за големите Атлетико Мадрид и Арсенал.
Најголемото изненадување го направи австрискиот Салцбург, кој со фантастични пет минути во второто полувреме успеа да го исфрли Лацио и покрај тоа што клубот од Рим имаше предност од 4:2 по првиот меч.
Чиро Имобиле во 55. минута донесе водство за гостите по што Италијанците помислија дека веќе се во полуфиналето, но само минута подоцна, Изралецот Мунас Дабур израмни за домаќините. Но, тогаш следуваше австриската „фурија“ – од 72. до 76. минута Лацио прими три гола (Хајдара, Хванг и Лаинер) за апсолутен пресврт на Салцбург со што обезбедија двомеч за пласман во финалето.
„Лудо“ беше на „Велодром“, каде што Марсеј успеа да ја надополни разликата од 0:1 против германскиот вице-шампион РБ Лајпциг, победувајќи со 5:2 во меч кој имаше „фуриозен“ почеток.
Лајпциг дојде во водство уште во втората минута преку Брума, но до деветтата минута беше 2:1 за Марсеј – прво Илзанкер си постигна автогол во шестата минута, пред Буна Сар да создаде делириум во француското пристаниште. Флоријан Тован во 38. минута зголеми на 3:1, резултат кој остана на полувреме и ги носеше Марсеј во полуфиналето.
Тука не завршија возбудувањата. Жан-Кевин Огистин во 55. минута го намали водството на Марсеј на 3:2 (резултат со кој Лајпциг одеше понатаму), пред Димитри Паје да зголеми на 4:2 само пет минути подоцна. Хироки Сакаи во 94. минута стави печат на импресивната европска ноќ на „Велодром“.
Главните фаворити Арсенал и Атлетико Мадрид се во полуфиналето, но воопшто не им беше едноставно.
„Топчиите“ на гостувањето кај ЦСКА Москва губеа со 2:0 сѐ до 75. минута и на Русите им беше потребен само уште еден гол да го елиминираат тимот на Арсен Венгер и покрај победата од 4:1 во Лондон. Чалов во 39. и Набабкин во 50. минута ги ставија навивачите на „топчиите“ во незгодна ситуација, пред Дени Велбек во 75. минута со гол да го „визира“ патот до полуфиналето, а Дени Велбек во 92. минута обезбеди Арсенал да си замине непоразен.
Се „тресеа“ и во тимот на Атлетико и покрај 2:0 предноста од првиот меч, откако Спортинг Лисабон, чиј претседател влезе во конфликт со фудбалерите по поразот во Шпанија, поведе со голот на Фреди Монтеро уште во 28. минута од мечот.
За разлика од првиот натпревар, овојпат во составот од стартот беше и македонскиот репрезентативец Стефан Ристовски.
ЛИГА ЕВРОПА, 1/4 ФИНАЛЕ, 2.НАТПРЕВАРИ
ЦСКА Москва – Арсенал 2:2
Прв натпревар: 1:4, вкупен резултат 3:6
Марсеј – РБ Лајпциг 5:2
Прв натпревар 0:1, вкупен резултат 6:3
Салцбург – Лацио 4:1
Прв натпревар 2:4, вкупен резултат 6:5
Спортинг Лисабон – Атлетико Мадрид 1:0
Прв натпревар: 0:2, вкупен резултат 1:2
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.