Фантастична атмосфера, идеални услови и организација надополнети со одлични резултати се главните впечатоци на досегашните натпреварите на Претсветскиот параглајдинг куп што се одржува во Крушево

Во третата, најкратка досега трка со должина од со 45,3 км од Крушево до битолското село Крклино повторно победи Бугаринот Јасен Савов со што ја потврди својата супериорност зацврстувајќи се на првата позиција и во генералниот пласман. Савов оствари време од 1 час 2 минути и 14 секунди, пред македонскиот репрезентативец Владимир Неделковски и Словенецот Матеј Чеглар. Интересно е дека иако на целта стигна прв, сепак поради пропуст победникот во првата трка Мартин Јованоски заработи казнени поени по што трката ја заврши на 7-то место.Во генерален пласман води Савов со 2.833 поени, пред Чеглар со 2.767 и Јованоски со 2.739 поени, и меѓу нив ќе се бара победникот на натпреварувањето. Во екипна конкуренција, од 16 состави, по трите трки во водство е словенечкиот тим „Орачи“ со 7.548 бодови, пред украинскиот „Неар Бирдс“ со 7.200 и македонскиот „Хели“’ со 6.911 бодови. Самиот натпревар поминува во најдобар ред, и иако се присутни на стартот, засега за среќа немаат потреба од никаква интервенција присутните членови на Единицата за спасување од планини и непристапни терени, што како факт сам по себе доволно зборува за безбедноста на натпреварот.Денеска на програмата е последната петта трка по што ќе следи сумирањето на резултатите, а од 19 часот во хотелот „Монтана“ ќе започне церемонијата на прогласување на најдобрите и доделувањето на наградите. Потоа со голем оптимизам ќе се чекаат оценките и мислењата на ФАИ и ИФЦ за организацијата и квалитетот на натпреварот со надеж дека ќе бидат највисоки за да идната година Крушево и овој натпревар бидат во календарот како организатори на натпревар од класата на Светски куп.