Селекторот на англиската репрезентација, Фабио Капело, е уште еден во низата незадоволни од официјалната топка, Џабулани, на Светското првенство во фудбал во Јужна Африка

Капело смета дека е најлошо направена топка до сега за светските првенства. Италијанецот вели дека топката влијае на квалитетот на натпреварите во Јужна Африка, а најмогу го загрижува што Џабулани може да му ги расипе тактичките планови, кои грижливо ги ковал подолго време. Поради непредвидливоста на топката, особено во воздух, Капело размислува да ја смени тактиката, па планира наместо Емил Хески, против Алжир во петок, во почетната постава да го сврсти Џереми Дефо, затоа што верува дека пасовите кон напаѓачите по земја би биле далеку подобра варијанта. „Оваа топка е најлоша што сум ја видел во животот“, вели Капело. „Катастрофална е и за голманите и за играчите. Невозможно е да се предвиди нејзината патека. Незгодна е за шутирање, но сепак, нема проблем кога се праќа по земја, но долгите пасови, по воздух се голем проблем. Многу е тешко да се предвиди каде ќе падне. Понекогаш навистина е тешко да ја контролираш. Ако мене ме прашувате, ова е најлошо направената топка некогаш“, додава Капело, кој во петок на денот на мечот против Алжир полни 64 години. Капело не е осамен пример меѓу селекторите кои дигнаа глас против Џабулани. Му се придружи и колегата Свен Горан Ериксон, селекторот на Брегот на Слоновата Коска.