Калчолигашот Интер и премиерлигашот Манчестер Јунајтед се двете екипи кои покрај ФК Копенхаген и Шахтјор Доњецк денеска обезбедија пласман меѓу осумте најдобри во Лигата на Европа.

„Нероазурите“ со 2-0 славеа рутинирано против шпански Хетафе на неутрален терен, во Гелзенкирхен.

Интер до водство од 1-0 дојде по една соло акција на Ромелу Лукаку во 33 минута кога успеа да се ослободи од својот чувар и прецизно да бие покрај стативата.

Хетафе пропушти 100-процентна можност за израмнување во 75 минута. По ВАР асистенција, добија пенал, Годин играл со рака во шеснаесетникот. Капитенот Молина биеше неколку сантиметри покрај голот на Хандановиќ.

Казната ги стигна само 8 минути подоцна. Штотуку влезениот во игра, Ериксен искористи една неспретна интервенција на дефанзивците на Хетафе, па биеше прецизно за 2-0.

На „Олд Трафорд“ Манчестер Јунајтед со 2-1 го победи ЛАСК, но мечот беше решен уште на првиот дуел кој „ѓаволите“ го добија со 5-0.

Стрелци за Јунајтед во новата победа беа Лингард во 57 и Марсијал во 88 минута, а почесниот гол за гостите (прекрасен волеј удар) беше дело на Висингер во 55 минута.

Англиските медиуми пишуваат дека 18-годишниот холандски фудбалски дефанзивец, Ксавиер Мбуиамба кој минатата сезона настапуваше за младата екипа на Барселона од лето ќе стане играч на Челси.

Агентот на младиот играч, Карлос Барос вели дека има повеќе заинтересирани клубови – Реал Мадрид, Јувентус и Интер, но Челси се чини најсериозниот кандидат.

На Островот младиот играч го споредуваат со Ван Дајк (Ливерпул), а неговите добри игри во татковината беа препорака Барселона да го доведе во својот млад тим.

Мбуиамба и тогаш беше на чекор до Челси, тој одработи неколку тренинзи во Лондон, но откако УЕФА на „сините“ им забрани да купуваат играчи, во приказната се вклучи Барса.

„Сакав во Челси, први дојдоа до мене и покажаа дека ме ценат, но поради забраната за трансфери, не можеа да ми понудат договор. Тогаш одлучив за Барселона“ вели младиот Холанѓанец.

Висок е 195 сантиметри, добро е технички поткован, а еднакво добро може да игра и на десната бековска позиција и на средината на дефанзивата.

Оние кои ја следат неговата игра сметаат дека одличен е „еден на еден“, има одличен преглед на играта, а има и ментална зрелост за годините.

Шахтјор Доњецк и ФЦ Копенхаген се првите четвртфиналисти во Лига Европа откако денеска продолжија натпреварите во ова натпреварување по паузата поради коронавирусот.

Шахтјор на домашен терен славеше против бундеслигашот Волфсбург со 3-0 иако и по првиот меч имаше предност од 2-1.
Мечот во Украина беше без голови се до 89 минута, а потоа „портокаловите“ за неколку минути во финишот со 3 брзи гола со стил влегоа меѓу осумте најдобри во ЛЕ.

Два гола постигна Мораеш, а еден беше дело на Соломон за убедлив триумф.

Во Данска, ФЦК ја анулираше предноста од првиот дуел (1-0) против турскиот шампион Истанбул Башахшекир и со убедливи 3-0 ги елиминираше Турците.

На „Телиа Паркен“ водство од 1-0 донесе Џонас Олдер Винд уште во 4 минута. На 2-0 зголеми истиот играч во 52 минута, а точка на победата стави Расмус Фалк во 62 минута.