Лидерот во шпанската Ла лига, мадридски Реал без многу мака, рутински дојде до трите бода на мечот против Алавес во рамки на 35-тото коло.

На стадионот „Алфредо ди Стефано“ во Мадрид, Реал со 2-0 славеше против Алавес и повторно се одлепи на 4 бода од второпласираната Барселона, на врвот на табелата во Ла лига, а преостануваат 3 кола до крајот на сезоната.

Критичарите на пулените на Зинедин Зидан, а посебно заговорниците дека ВАР му помага на мадридскиот клуб да стигне до титулата вечерва повторно ќе имаат за што да коментираат.

Реал дојде во водство во 11 минута. Стрелец од белата точка беше Бензема, во отсуство на суспендираниот Рамос кој е непогрешлив од ударите од 11 метри.

Сепак во најмала рака дискутабилно е дали имаше пенал. Менди при еден продор од левата страна падна во противничкиот шеснаесетник, но останува дилемата дали Наваро стартуваше над него или, пак, актерските способности на Менди дојдоа до израз.

Тоа беше резултатот по првиот дел, во кој поседот на топката беше 76% наспроти 24% во полза на домашната екипа.

Во вториот дел Бензема успешно избегна офсајд замка (милиметри беа во прашање), па асистираше до Асенсио за 2-0 во 50 минута. Додека играчите на Реал славеа, судијата Манзано го консултираше ВАР и потоа покажа на центарот на теренот. Во двете ситуации очигледно немаше офсајд.

До крајот на мечот немаше промена на семафорот, па Реал дојде чекор поблиску до новата титула.

Алавес, пак, е на 3 бода над зоната за испаѓање, го очекува грчевита борба за опстанок.

Судот за спортска арбитража во Лозана во понеделник во 10.30 часот ќе ја објави одлуката во врска со жалбата на Манчестер Сити за двегодишната забрана за учествувње во европските натпреварувања поради кршење на финансискиот фер плеј.

УЕФА го казни Сити поради кршењето на финансискиот фер плеј, но и поради тоа што Управата на клубот не соработувала со истражителите. Има и финансиска казна од 30 милиони евра за прекршокот направен во периодот од 2012 до 2016 година.

Клубот вложи жалба, а тренерот Пеп Гвардиола очекува промена на одлуката.

„Уверен сум дека и следната сезона ќе играме во Лигата на шампиони, затоа што ги видов аргументите на клубот“ – рече Гвардиола.

Конечната одлука е многу важна за „граѓаните“. Доколку останат без учество во ЛШ, големо прашање е што ќе се случи со најголемите ѕвезди во екипата и на крај на краевите, каква ќе биде судбината на Гвардиола на „Итихад“.

Легендата на Вердер Бремен и на Баерн Минхен, перуанскиот фудбалер, Клаудио Пизаро (41) ги „закачи копачките на клин“.

Германските медиуми ги сумираа бројките што ја одбележаа неговата фудбалска кариера и тие се импресивни.

Негов последен меч беше реваншот од баражот за опстанок во Бундеслигата на кој Вердер одигра 2-2 кај Хајденхајм и остана прволигаш.

Пизаро мечот го проследи од клупата и потоа оди во фудбалска пензија.

Вкупниот број бундеслигашки голови кои ги постигна е 197, на 490 мечеви. На тие ќе се додадат уште 38 во Купот на Германија. Постигна 109 гола за Вердер, 87 за Баерн и само еден за Келн.

Најдраг противник на Пизаро во бундеслигашката кариера е Хамбургер. На 35 меча против нив, постигнал 21 гол. Во кариерата во Бундеслигата помина 21 сезона.

Првпат мрежата во најквалитетната германска лига ја затресе на 12 септември 1999 година, а неговиот последен погодок во Бундеслигата е на 18 мај 2019 година против Лајпциг во последното коло од минатогодишната сезона.

Тој гол го прави најстар стрелец на погодок во германската прва лига, тогаш имаше 40 години и 227 дена.

Пизаро шестпати ја освојуваше Бундеслигата со Баерн Минхен, а со Баварците стигна и до 5 пехари во Купот на Германија. Со минхенскиот клуб ја освои и Лигата на шампиони во 2013 години.

Пехар во Купот освои и со Вердер, во 2009 година.