Атлетик Билбао се покажаа како специјалисти за куп-натпреварувањата, откако во реваншот од полуфиналето на Копа дел реј, со 2:1 славеа кај Леванте на Енис Барди со гол во 112. минута од продолженијата.

Марти Рохер ги донесе Леванте во водство во 17. минута од мечот, но веќе во 30. минута Атлетик израмни на 1:1 со гол од пенал на Раул Гарсија. Барди влезе во игра во второто полувреме, но домаќините не успеаја да стигнат до голот кој им носеше прво финале во историјата на клубот, пред во 112. минута преку Алехандро Беренгер стигнаа до голот вреден финале.

Атлетик го чека и финалето од Копа дел реј од минатата сезона, против баскискиот ривал Реал Сосиедад, кој лани беше одложен поради пандемијата на КОВИД-19. За потсетување во средината на јануари во еден драматичен меч, Атлетик успеа да ја совлада Барса со 3:2 по продолженијата за да ја освои титулата од Суперкупот на Шпанија.

GOOOOL CON SABOR A FINAL

Levante 1 🆚 2 Athletic Club#CopaDelRey

pic.twitter.com/xeHKMUVfh9

— Garra Sports (@GarraSportsMx) March 4, 2021

Челси стигна до супер-важна 1:0 победа на гости кај Ливерпул за да ги зголеми шансите за топ 4 пласман, и во исто време да им го нанесе на „црвените“ неверојатниот петти пораз во низа на „Енфилд“, откако претходно имаа 68 меча без пораз на славниот фудбалски храм.

Челси ја контролираа играта во првото полувреме, кога прво голот на Тимо Вернер зачудувачки беше поништен поради минимален офсајд во 24. минута, за потоа во 42. минута, Мејсон Маунт со прекрасна соло акција да го совлада Алисон и да донесе водство за тимот на Томас Тухел. Во второто полувреме, Ливерпул „притискаше“, но и Челси имаше свои шанси, од кои во една само реакцијата на Алисон ги спаси од 0:2.

Со трите поени, Челси се искачија на 4. место со 47 поени, еден пред Евертон, додека актуелните шампиони Ливерпул се само седми со 42 поени по дури осмиот пораз во 2020/21.



На Интер им беа потребни речиси цел час игра за да го „скршат“ отпорот на Парма, но потоа на сцена стапи Алексис Санчез, кој постигна два гола за осум минути за да ги предводи „нераѕурите“ до 1:2 победа со која се одвоија на фантастични шест поени предност на првото место во Серија А во обид да стигнат до првото скудето од 2010 година.

Во првото полувреме на „Енио Тардини“, Интер имаа неколку убави шанси, од кои најубавите преку Кристијан Ериксен и Ромелу Лукаку, но на одмор се отиде со 0:0.  Потоа на сцена стапи Санчез, кој двапати на асистенција на Ромелу Лукаку (инаку двајцата поранешни соиграчи од Манчестер јунајтед) во 54. и 62. минута за обезбедување на трите поени. Ернани во 71. минута намали на 1:2 за да го зголеми притисокот на „нераѕурите“, но до крајот на мечот тоа беше конечниот скор.

Интер сега има 59 поени на врвот на Серија А, шест повеќе од Милан откако тие вчера одиграа само реми со Удинезе и 10 поени пред Јувентус и Аталанта, иако Јуве има натпревар помалку. Шансите на Парма да останат во елитата пак, се минимални, откако Дукали имаат 15 поени, шест од безбедната зона.