Град Скопје го награди со 100.000 денари младиот Ардијан Аземи, освојувач на бронзен медал на Европското првенство во бокс за младинци, кое пред две недели се одржа во Будва.

„Врз основа на Програмата за активностите во областа на спортот и младите во град Скопје, Градот Скопје редовно финансиски и логистички ги поддржува спортските клубови регистрирани на подрачјето на град Скопје, како што во овој случај е финансиската и логистичка поддршка на Боксерскиот клуб „Шкупи“ од Скопје, неколку години наназад. Во последниве 6 години постојан член на „Шкупи“ е наградениот 17-годишен боксер Ардијан Аземи, кој со младинската боксерска репрезентација на Република Северна Македонија го постигна најголемиот успех на македонскиот младински бокс, и за првпат по 25 години во младинските категории освои еден од највисоките пласмани на едно европско натпреварување“, соопшти Град Скопје.

Градот Скопје финансиски го поддржа и боксерскиот клуб „Шкупи“ така што во 2020 година преку Програмата за Спорт им додели 50.000 денари, а во 2019 година 40.000 денари за активностите на клубот.

Денес во данските градови Херминг и Колдинг започнуваа Европското првенство за ракометарки. Првенството ќе заврши на 20.декември. Турнирот требаше да се игра и во Норвешка, но оваа држава се откажа од организацијата поради пандемијата на вирусот Ковид-19.

На ЕП во Данска, кое воедно ќе биде и квалификациско за пласман на Светското првенство наредната година (Шпанија, 2. до 19.декември), ќе учествуваат 16 репрезентации, кои се поделени во четири групи.

По завршувањето на првата фаза, по три селекции од секоја група ќе продолжат понатаму и ќе бидат формирани две нови групи. Селекциите ќе ги пренесуваат бодовите освоени во првата фаза.

Двете најдобри селекции од секоја група ќе се пласираат во полу-финалето и ќе изборат пласман на Светското првенство.

Титулата во Данска ќе ја бранат репрезентативките на Франција. Во најтесниот круг на фаворити покрај Франција и Данска се уште и Норвешка, Холандија, Шпанија и Русија.

Првенството од 18 часот ќе го отворат Романија и Германија, 15 минути подоцна ќе започне дуелот дербито на денот помеѓу Русија и Шпанија. Од 20.30 часот на програмата се натпреварите Норвешка-Полска и Шведска-Чешка.

Натпреварот помеѓу Манчестер јунајтед и ПСЖ, покрај победата на францускиот тим (1:3), го обележа и судирот помеѓу Нејмар и Скот Мектоминеј.

Во еден момент, во првиот дел од натпреварот, Шкотланѓанецот во дуел згазна на глуждот на бразилскиот фудбалер. Од почетокот на минатата сезона Нејмар двапати имаше проблеми со глуждот на десната нога, поради што пропушти голем број натпревари.

По завршувањето на првото полувреме Нејмар сакаше да се пресмета со Мектоминеј, а откако ги раздвоија нивните соиграчи, Бразилецот се жалеше кај судијата Даниеле Орсато.

„Немам зборови со кои би го опишал однесувањето на нивните фудбалери“, рекол по натпреварот Мектоминеј.

„Не сакам да зборувам за нив. Можам само да си направам проблем доколку проговорам. Исто така не сакам да зборувам за судијата“, дополнил фудбалерот на Манчестер јунајтед, а потоа го критикувал ВАР-системот.

„Разбрав дека од мал офсајд сме примиле гол. Сведоци сме на такви грешки секоја недела. Мораме тоа да го поправиме и да го вратиме фудбалот на вистинските патеки“.

Манчестер јунајтед во последното коло ќе гостува во Лајпциг, додека ПСЖ ќе игра против Башакшехир. По пет натпревари Јунајтед, ПСЖ и Лајпциг имаат по девет поени.