Барселона летово ќе се обиде да продаде неколку првотимци за да направи простор за нови засилувања. Еден од отпишаните е данскиот напаѓач Мартин Брејтвајт, кој поради тешка повреда го пропушти најголемиот дел од минатата сезона.

Иако пред четири месеци се врати во тимот, не одигра речиси ниту една минута, што беше јасен показател дека Чави не смета на него и дека целта на Барселона е што поскоро да го продаде.

Барса има неколку понуди за него од Шпанија и Англија, но Данецот одбива да го напушти клубот, бил решен да остане до крајот на договорот.

„Имам уште две години договор со Барселона и не ми паѓа на памет да размислувам за заминување од клубот пред истекот на договорот. Во професионалниот фудбал се е можно, но јас сум прилично смирен бидејќи многу добро знам што сакам“, рече Брејтвејт.

“Ќе работам напорно за време на подготовките за новата сезона за да се обидам да се наметнам кај тренерот. На некои работи не можам да влијаам. Ќе видиме што ќе се случи на крајот”.

30-годишниот фудбалер дојде во Барса во февруари 2020 година од Леганес за 18 милиони евра, има договор до летото 2024 година и плата која тешко ќе му ја даде еден клуб повторно. Сезонава одигра само четири натпревари и постигна два гола.

Хулијан Алварез влезе во историјата на славниот аргентински клуб, Ривер плејт. 22-годишниот напаѓач, во победата на Риве плејт над Алијанса од Лима (8:1) постигна шест гола. Дуелот се одигра во групната фаза, во Копа Либертадорес.

На 121. роденден на великанот од Буенос Аирес, новиот напаѓач на Манчестер сити влезе во историјата на клубот.

Во исто време, тој стана само вториот играч во историјата на Копа Либертадорес кој успеал да постигне шест гола на еден натпревар, пред него истото го направи само поранешниот фудбалер на Боливија Блуминг, Хуан Карлос Санчез во далечната 1985 година.

Алварез, во јануари, потпиша договор со Манчестер сити. „Граѓаните“ за неговиот трансфер издвоија 17.000.000 евра и го оставија на позајмива во Ривер плејт.

Младиот напаѓач наскоро ќе се пресели во Англија. Тренерот Марсело Гаљардо, потврди дека Алварез ќе игра во првиот натпревар во нокаут фазата, а потоа ќе го напушти клубот.

Инаку, Ривер плејт, го освои првото место во Ф-групата, пред Форталеза (Бразил), Коло Коло (Чиле) и Алијанс Лима (Перу).



Со победата на Рома во финалето на Конференциската лига против Феенорд (1:0), Жозе Мурињо стигна до петтиот трофеј во своето петто европско финале. Пред Рома, Португалецот освојуваше европски трофеи со Порто, Интер и Манчестер Јунајтед.

Мурињо стана само вториот стручњак во историјата со пет европски титули. Пред него е само Италијанецот Џовани Трапатони, кој успеа да го освои Купот на шампионите со Јувентус (1985), два Купа на УЕФА (1977, 1993) и Купот на победниците на куповите (1984), а со Интер има трофеј во Купот на УЕФА (1991).

Откако судијата означи крај на натпреварот, Мурињо се расплака.

„Испишавме историја. Ќе ја одбијам секоја понуда. Оставете ги гласините, останувам тренер на Рома. Овие 11 месеци во Рома беа прекрасни. Им кажав на момците дека во Серија А го направивме тоа што требаше да го направиме, да се квалификуваме за Лига Европа. Ја испишавме историјата на Рома“, изјави Мурињо по финалната пресметка во Тирана и дополни.

„Ми кажаа дека сум како Фергусон и Трапатони затоа што освоив трофеи во три различни децении. Јас сум Интертиста, јас сум човек на Челзи, го сакам Реал, но исто така сум и романист. Почнав во 2003 година и се уште сум тука. Јас победувам…“