Кошаркарите на Монако постигнаа рекордна победа во 14-то коло од Евролигата. На домашен терен, тие го победија Париз со 125:104 и поставија нов рекорд во натпреварувањето за најмногу постигнати поени од еден тим во натпревар без продолженија.

Тимот од Кнежевството има сооднос од 9:5, додека Париз падна на 5:9. Првото име на средбата беше Ели Окобо, кој постигна 26 поени со четири скока и осум асистенции.

Претходниот рекорд беше 123 поени, а го делеа натпреварите меѓу Макаби од Тел Авив и Скаволини од Пезаро одиграни на 25 ноември 2004 година, и натпреварот меѓу Панатинаикос и Роан на 21 ноември 2007 година. Монако го надмина тој учинок во убедлива победа.

Апсолутниот рекорд во Евролигата за бројот на поени во еден натпревар го држи Реал Мадрид. Шпанскиот великан постигна 130 поени во јануари 2024 година против Анадолу Ефес во натпревар кој заврши со четири продолженија, во кој турскиот претставник уфрли 126 поени.

Во Белград, Партизан го победи Баерн со 92:85. Ова беше прв натпревар на црно-белите без Жељко Обрадовиќ на клупата. Ја забележаа втората победа на последните девет натпревар. Партизан има скор 5 победи и девет порази.

Мечот се одигра во чудна атмосфера. Навивачите со свирежи ги дочекаа и испратија своите играчи. Во текот на целиот натпревар тие го извијуваа името на тренерот Обрадовиќ.

Најефикасни во тимот беа Двејн Вашингтон и Тајрик Џонс со по 19 поени.

Foto/ EPA

Фудбалерите на Лацио го елиминираа Милан од Купот на Италија, славејќи триумф со 1:0 (0:0) во осминафиналето.

Дербито на ова коло од натпреварувањето имаше своја увертира неодамна во Серија А, но на „Сан Сиро“, кога росонерите славеа со минимален резултат.

Сега во Купот, „небесно сините“ одговорија и се одмаздија, што е можеби уште поболно за тимот на Масимилијано Алегри, бидејќи Милан остана без можност да се бори за еден од двата домашни трофеи.

Милан беше подобар во првото полувреме, но не успеа да ја наплати добрата игра.

Херој на домашниот тим е Матија Закањи, кој во 80-та минута го совлада Мајк Мењан со глава и со тоа му донесе победа на својот тим.

Лацио ќе игра против Болоња во четвртфиналето. Болоња го брани трофејот во Купот.

Foto/ EPA

Фламенго го освои бразилското првенство, откако го победи Сеару со 1:0 на стадионот „Маракана“ во Рио де Жанеиро, благодарение на голот на крилниот напаѓач Самуел Лино. Ова се случи четири дена по освојувањето на Копа Либертадорес, Латиноамериканската Лига на шампиони.

Тимот од Рио има 78 бода, пет повеќе од Палмеирас, нивниот противник во финалето на Либертадорес, на коло до крајот на сезоната.

Ова е осма титула на Фламенго во Бразил (1980, 1982, 1983, 1992, 2009, 2019, 2020 и 2025). Сега се изедначени со Сантос и веднаш е зад Палмеирас, кој има рекордни 12 титули.

Само Сантос на Пеле во 1962 и 1963 година, Фламенго во 2019 година и Ботафого во 2024 година успеаја да го освојат и домашниот шампионат и Копа Либертадорес во една сезона. Фламенго стана и првиот бразилски клуб што освои четири титули во најпрестижното клупско натпреварување во Јужна Америка.

Најзаслужен за успехот на Фламенго е легендарниот фудбалер на Атлетико Мадрид, Фелипе Луис. Предводени од него, фудбалерите на Фламенго освоија сè што може да се освои во последните 14 месеци.

Трофеите од првенството Кариока, потоа Купот на Бразил, Бразилскиот Суперкуп, Копа Либертадорес и сега бразилското првенство.

Младиот бразилски тренер сега треба да го освои Интерконтиненталниот куп за да собере шест трофеи и да стане првиот стручњак што го сторил тоа по Пеп Гвардиола со Барселона во 2009 година.

Foto/ EPA