Домашен
Борко Ристовски и донесе бод на Македонија во Чешка
Македонската ракометна репрезентација одигра 27-27 во Чешка, во рамките на квалификациите за пласман на Европското првенство во 2016 година. Македонија до бод на ‘жешкиот’ терен во Злин стигна благодарение на брилијантниот Борко Ристовски кој имаше 20 успешни интервенции. Избраниците на селекторот Обрван до бод стигнаа иако по првото полувреме имаа негатива од седум гола (18-11).
Македонските ракометари добро го отворија натпреварот во Злин, Борко Ристовски беше мошне сигурен на голот, одбрани шест удари во првите 10 минути, со што и даде дополнителна сигурност на одбраната. Во нападот бековската тројка со Миркуловски, Мојсовски и Кире Лазаров, умешно ги користеше сите пукнатини во чешката одбрана и по 11 минути игра Македонија имаше предност од три гола (3-6).Дека на домашен терен се една од најнезгодните европски селекции Чесите демонстрираа за само четири минути, кога во периодот од 11.до 15.минута постигнаа пет гола и стигнаа до предност од два гола (8-6).Миркуловски, во ситуација кога Македонија беше со играч помалку ја прекина серијата на противникот, но само за момент. Чесите веднаш возвратија со уште една серија 3-0 за предност од 12-8, по што макдонските играчи влегоа во серија на грешки (пет загубени топки во првиот дел), Манасков промаши два зицери, а противникот немилосрдно ги казнуваше сите грешки за конечни по првото полуврме 18-11. Чешка во периодот од 11. до 30.минута постигна 15, а прими само пет гола. Голманот Галиа одбрани осум удари во првото полувреме, а Линхарт и Здрахала постигнаа по четири гола. Вториот дел, повторно одлично го отвори Борко Ристовски, одбрани четири удари во првите седум минути, нападот започна да функционира и со серија од 1-5, Македонија го намали резултатот во 38.минута на 20-16. Серијата на Македонија ја прекина најдобриот чешки играч Линхарт со својот шести гол за 21-16, веднаш потоа Македонија не реализира три напади, што го казни Бабак за 22-16. На двата гола на Чешка, Македонија одговори со иста мерка, преку Кире Лазаров и Георгиевски за 22-18 во 42.минута. Мини серијата на Македонија чешкиот селектор одговори со минута одмор. Ниту тајм аутот не ја успеа да ја запре серијата на македонските ракометари, во серија погодуваа Мојсовски, Никола Маркоски и Манасков за намалување на резултатот на два гола (23-21) во 46.минута. Првиот налет на Македонија, Чешка го одби со двата гола на Собол и Страхала, меѓу тие погодци на чесите од крило не успеа да реализира Вугринец. Негативата на два разлика повторно ја врати Кире Лазаров со својот деветти гол (25-23). Чесите во вториот дел не играа така течно во нападот, одбраната на ‘црвено-жолтите’ започна да функционира, најмногу благодарение на голманот Ристовски. Таквата игра на Македонија и донесе израмнување во 52.минута (25-25), голови постигнаа Мојсовски и Миркуловски.Капитенот имаше можност да и донесе предност на Маедонија, но најпрвин промаши удар од седум метри, а вториот негов одби го одбрани искусниот Штохл. во следниот напад при резултат 25-25 Миркуловски продаде една топка, а Линхарт ја врати предноста на Чешка (26-25). Десеттиот гол на капитенот Лазаров донесе израмнување. Со резултат 26-26 двете селекции влегоа во последните четири минути.До крајот двете репрезентации не реализираа по два напади и постигнаа по еден гол, Страхала за Чешка и Манасков за Македонија на 28 секунди до крајот. Во последната секунда Бабак упати удар кој го одбрани извонредниот Ристовски за конечни 27-27. Борко Ристовски беше прво име на мечот, тој одбрани 20 удари кон својот гол, стрелците ги предводеше Кире Лазаров со 10 голови, додека Миркуловски постигна пет, без промашување. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.