Домашен
Клубовите се за вонредно Собрание, МКФ не попушта, кошарката трпи
Кошарка во Македонија, кога станува збор за натпреварите во домашното првенство нема да има сигурно уште еден месец, откако двете страни Македонската кошаркарска федерација (МКФ) и клубовите цврсто стојат на своите ставови, кои мак-баскетот го доведоа во ќорсокак. Наместо викендов да започне првенството, кое доцни веќе две недели, ќе се чека вонредното Собрание кое го најавија клубовите.
Пред пет години, целата нација славеше и се радуваше на четвртото место кое репрезентацијата го освои на Европското првенство во Литванија. Марин Докузовски од клупата и Антиќ, Гечевски, Чековски, Мекејлеб, браќата Стојановски, Илиевски…тогаш беа вистински хит во Европа, а херои во Македонија.
Пет години подоцна земјата која ја сака кошарката се соочи со одложување на домашното првенство. Причините за една од засегнатите страни се банални, а за другата исправни и легитимни.
Несогласувањата започнаа на 7-ти октомври, кога Управниот одбор на МКФ ја донесе одлуката за зголемување на таксите за регистрација на странските кошаркари и кошаркарки, за кои клубовите оценија дека се превисоки.
Клубовите бараат таксите за регистрација на играчите да не се менува, бидејќи финансиски не можат да го издржат тој товар. Покрај тоа, од Здружението на прволигаши од МКФ побараа тие да го избираат комесарот за натпреварување и сами да ја водат Првата лига.
МКФ во меѓувреме реши делумно да ја суспендира одлуката на Управниот одбор донесена на 7-ми октомври, а која се однесуваше на висината на таксите за регистрација на домашните кошаркари и кошаркарки во сите рангови на натпреварување и таа да се остане иста како и во сезоната 2015/2016, додека на сила останува одлуката за висината на таксите за странските играчи во македонската кошарка.
„Со оваа одлука сакаме да дадеме до знаење дека развојот на македонските кошаркари и кошаркарки, останува наш приоритет и за во иднина, а покажуваме и дека не сакаме да создаваме никакви проблеми во нормалното функционирање на клубовите. Со ова сметаме дека целосно се надминати сите пречки за почетокот на домашните првенства во предвидените рокови, а стартот на Првата лига останува да зависи исклучително од прволигашите. И за што не гледаме наша вина за евентуалното неиграње на Првата лига“, стои во соопштението кое е објавено на официјалната страница на МКФ.
Ваквата одлука воопшто не го омекна ставот на клубовите, напротив, тие решија да покренат иницијатива за свикување на вонредно Собрание.
„Ако во рок од 14 дена не свика, тогаш ние сами ќе го организираме. Сметам дека оваа сезона треба да започне по стариот регистрационен правилник, а од наредната сезона заеднички да се договориме и да бидат имплементирани тие промени“, рече претседателот на Здружението на прволигаши, Видоја Секулоски.
Вонредно Собрание може да биде свикано доколку најмалку осум клубови поднесат барање, а дотогаш најмногу ќе трпат клубовите и кошаркарите, со исклучок на оние кои играат на меѓународна сцена (АБА лигата, Еврокупот и БИБЛ лигата)./крај/мф/нц
Извор: макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.