Домашен
Руски дебакл на ЖРК Вардар
Ракометарките на Вардар забележаа нов гостински пораз во натпреварите во Лигата на шампионките. Во неделата попладне ЖРК Вардар убедливо загуби во Волгоград од Динамо Синара со 33:25 (15:12).
Вардарки против Динамо, уште еднаш ги презентираа слабостите во играта во одбраната и нападот и загубија четврти пат сезонава во петтиот одигран натпревар на гостински терен.Екипата на Индира Кастратовиќ со овој пораз си ги направи ништожни шансите да стигне до второто место во Групата 1, што би и донел полесен противник во четвртфиналната рунда. Ракометарките на Вардар добар ритам против Динамо имаа само во првите 10 минути, кога имаа предност од два гола (3:5), но потоа домашниот тим го засили ритамот, во наредните шест минути направи серија од 6:2 стигна до предност од 9:7 со што ја навести победата.Динамо немилосрдно ги казнуваше грешките и ги користеше подароците од вардарки и константно ја зголемуваше својата предност 12:8 во 21.минута, потоа и 15:10 во 26.минута.Мала надеж ‘црвено-црните’ дека ќе изборат поволен резултат добија во периодот од 27. до 32.минута кога намалија на два негатива (15:13), но од тој момент тие повторно влегоа во ‘црна дупка’, Динамо ја врати предноста од пет гола која и ја зголеми до крајот на мечот: 21:15 во 42.минута, 24:17 во 46.минута, 27:18 во 52.минута.ЖРК Вардар на овој меч немаше игра, катастрофално играше централниот дел на одбраната (бековите на Динамо постигнаа 21 гол), а во нападот се играше на индивидуален квалитет и со многу технички грешки (вардарки загубија 17 топки).Поразот на ЖРК Вардар веројатно ќе беше и поубедлив доколку на голот не беше Амадин Лејно која мечот го заврши со 14 одбрани (10 во првото полувреме). Кочетова со девет и Акпјан со шест гола го предводеа тимот на Динамо до победата во Лигата на шампионките, додека кај Вардар по седум гола постигнаа Пенезиќ и Радичевиќ. ЖРК Вардар со овој пораз остана на петтото место на табелата во Групата 1 со пет бода, додека Динамо е на второто место со 10 бодови, три помалку од лидерот Будуќност. Наредниот меч во ЛШ Вардар ќе го одигра на 28.февруари кога во Скопје ќе гостува Лајпциг. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.