Дербито на Рур, меѓу Борусија Дортмунд и Шалке 04 во минатото беше пресметка со многу жар, амбиции за титула и неизвесност до самиот крај, а сега се претвори во борба меѓу фаворит и „фенерџија“.

„Милионерите“ од Дортмунд со 3-0 славеа против екипата од Гелзенкирхен.

Иако Борусија 55 минути беше на 0-0 со гостите, тогаш Акањи погоди за домашно водство.

Гостинот „се отвори“, па до крајот Халанд во 61 и Хумелс во 78 минута ја завршија работата.

Фудбалерите предводени од тренерот Фавр по 5 кола собраа 12 бода и се на третата позиција, веднаш зад Баерн Минхен кој исто така има 12 и лидерот на табелата, РБ Лајпциг со бод повеќе.

Шалке е во страша криза, 21 меч не знаат за победа, а моментно се претпоследни со само 1 бод од можни 15.

Новиот голман на Челси, Едуард Менди е откритието на Френк Лампард во новата сезона. Замената на киксерот Кепа Аризабалага денеска беше спасителот на Челси на жешкото гостување на „Олд Трафорд“, кај Манчестер Јунајтед.

Дуелот заврши нерешено, без погодоци.

Менди уште во првото полувреме во два наврати спаси сигурен гол по ударите на Рашфорд, односно Мата.

Статистиката која апсолутно беше на страната на домаќините вели дека „ѓаволите“ 14 пати шутнале кон голот на „сините“. Од тоа 4 одбранети удари има Менси, а трипати добро интервенирале дефанзивците.

Јунајтед играше на овој меч само со Рашфорд во нападот, а во позадина беа Џејмс и Фернандеш.

Лампард се реши за Вернер како прв пред голот на Де Хеа, со поддршка од Пулишиќ и од Хаверц.

Едисон Кавани доби можност за настап во второто полувреме, имаше и шанса за погодок, но биеше крај голот.

По ова коло Манчестер Јунајтед собра само 7 бода на 5 меча, доволно за 15-та позиција.
Челси, пак, има 9 бода и е 6-ти на табелата.

Претходно, Кристал Палас како гостин славеше против Фулам со 2-1.

Интер како гостин славеше победа од 2-0 против Џенова во 5 коло од Серија А.

Македонскиот фудбалер, Горан Пандев ги одигра сите 90 минути за домаќинот кој беше во инфериорна улога речиси во текот на целиот меч. Избраниците на Антонио Конте предводени од Ромелу Лукаку беа постојана закана по голот на голманот Перин.

Во првите 45 минути играчите на Џенова ниту еднаш не шутнаа кон голот на Хандановиќ, а истата слика беше и во второто полувреме.

Интер шестпати се закани, трипати топката одеше кон голот на Перин, а притоа две топки завршија во неговата мрежа.

Лукаку во 65 и Д`Амбросио во 79 минута беа стрелци на погодоците за нови 3 бода за „Нероазурите“ кои сега се трети на табелата со 10 бода по 5 меча.

Џенова која го одигра својот четврти сезонски натпревар, досега собра само 4 бода.