Шампионот од АБА лигата, Црвена звезда успеа да стигне до тесна и драматична 86:85 победа над Партизан во дербито во осмото коло на АБА лигата, откако Коди Милер-Мекинтаер утна обид за победа на „црно-белите“.

Без публика во вечното дерби, Звезда во поголемиот дел од мечот имаше водство, кое беше и двоцифрено, Партизан успеваше да се врати, пред во драматичен финиш да го загуби мечот.

Џордан Лојд беше најефикасен за победниците со 18 поени, Кори Волден додаде 16, додека Томас беше најдобар за Партизан со 19, а Милер-Мекинтаер заврши со 15.

По осум кола, Звезда е убедливо прва со осум победи, додека Партизан се на четвртото место на табелата со 4-4 скор.

Саутемптон продолжува со изненадувачките игри во новата сезона од Премиер лигата, откако ги намачија Вулверхемптон за 1:1 реми во понеделничкиот вечерен натпревар.

Тео Волкот ги донесе „светците“ во водство во 58. минута, пред „волците“ да успејат да израмнат преку Педро Нето, кој во 75. минута се најде на вистинското место по обидот на Раул Хименез.

Саутемптон останува на петтото место на табелата во Премиер лигата со 17 поени, додека Вулверхемптон е на деветтото место со 14 поени – интересно двата тима се пред Манчестер сити и Манчестер јунајтед на табелата.

Атлетико Мадрид поставија нов неславен рекорд, откако порталот „Гол“ тврди дека долгот на „рохибланкос“ сега е фантастични 999 милиони евра.

Тие тврдат дека имаат пристап до официјални документи на клубот во кои за крајот на сезоната 2019/20 долговите се зголемиле од 980 милиони на речиси милијарда евра. Според нив, приходите на клубот биле намалени за 32 милиони евра во сума од 325.3 милиони евра, а клубот заработил 100.5 милиони евра преку натпреварувањата (за 7 милиони евра помалку од лани).

Финансиската состојба кај повеќето европски големи клубови е нестабилна поради пандемијата на КОВИД-19 и отсуството на навивачи на трибините, но сепак, овие суми се загрижувачки. Долгот на Атлетико е толку голем поради неодамнешната изградба на фантастичниот стадион „Ванда метрополитано“.

Минатата сезона не беше најдобра за тимот на Диего Симеоне – тие беа елиминирани во четврт-финалето на ЛШ од РБ Лајпциг, загубија рано во Копа дел Реј од Леонеса, а сезоната ја завршија на третото место. Оваа сезона, пак, по победата над Барселона во текот на викендот, тие се блиску до првото место на табелата.