Тиражниот германски магазин „Шпигл“, објави документи, со кои тврди дека Флорентино Перез изнел невистини во интервјуто за „Ел Чингирито“.

Првиот претседател на Суперлигата, во интервјуто рекол дека 12.клубови не испратиле покани до Баерн, Борусија Дортмунд и ПСЖ.

„Ние се уште не го поканивме ПСЖ, а со Баерн и Борусија воопшто не сме разговарале. Во моментов има 12 основачи, а ние сакаме да бидат 15. Не е вистина дека Суперлигата ќе биде одложена бидејќи не се приклучиле Баерн и ПСЖ. Тоа се глупости“, рекол Перез.

„Шпигл“, го објави документот за основање на Суперлигата, во кој на трите клуба им се нуди не само да станат членови, туку имаат статус на „дополнителни основачи“.

Perez claiming that #PSG, #Bayern and #BVB were not invited is a straight up lie. Documents obtained by Der Spiegel show that #Bayern and #BVB were invited and have 30 days to join. PSG also invited but they have 14 days to join the Super League. (Via @derspiegel) pic.twitter.com/j20aDE7Y5l

— Dr. Manuel Veth (@ManuelVeth) April 19, 2021

Претседателот на УЕФА, Александар Чеферин, на 45. Конгрес на оваа организација, уште еднаш го осуди формирањето на Суперлигата. Во своето обраќање, тој им порачал на клубовите основачи, да се сетат каде биле пред 15, 20 или 30 години и да не го гледаат фудбалот само преку своите банкарски сметки. Во својот говор, Чеферин спомна и два клуба од Балканот, Црвена звезда и Динамо Загреб.

Веста дека 12 клубови (Реал, Барселона, Атлетико, Јувентус, Милан, Интер, Арсенал, Челси, Тотенхем, Ливерпул, Манчестер јунајтед, Манчестер сити) формираа своја лига, која ја нарекоа Суперлига, предизвика земјотрес во фудбалскиот свет.

„Каде беше Манчестер јунајтед во десенијата пред на сцената да стапи сер Алекс Фергусон. Се сеќавате? Каде беше Јувентус пред 15 години? Колку што знам во Серија Б. Доколку клубовите кои доминираа во европскиот фудбал пред 30 илим 40 години, се одлучеа да формираат Суперлига, како ќе изгледаше таа? Тука ќе беа Нотингем форест, Астон Вила, Хамбург, Стеауа, Порто, ПСВ Ајндховен, Црвена звезда. Тие тогаш беа кремот на европскиот фудбал. Во тие времиња тоа ќе беше Суперлигата. Но фудбалот се менува, а некои тоа не можат да го разберат. Тие ги гледаат промените само на своите сметки во банките“, рекол Чеферин и дополнил.

„Ти клубови што сега мислат дека се недопирливи, треба да се сетат откаде дојдоа. Терба да разберат дека ако сега се европски гиганти, тоа е и поради тоа што УЕФА 60 години ја брани идејата, само спортските резултати да бидат важни во натпреварувањата. Без УЕФА кој знае каде ќе беа…“

Моделот на Суперлигата многумина го споредија со НБА лигата и велат дека на овој начин европскиот фудбал ќе биде америкаризиран.

„Некои мислат дека за да успееме треба да копираме нечии друг модел. Но, не заборавите дека постои причина поради која европскиот фудбал е најпопуларен. Европскиот фудбал се темели на моделот кој успеа да му одолее на забот на времето. Ова е модел кој е заснован на различности. На натпреварите што ги организира УЕФА потребни и се Аталанта, Селтик, Ренџерс, Динамо Загреб, Галатасарај. Потребни ни се овие клубови. Луѓето мора да знаат дека во фудбалот се е можно, дека секој има шанса“.

Претседателот на ФИФА, Џани Инфантино, рекол дека оваа организација не ја поддржува Суперлигата и дека сите клубовите ќе треба да се соочат со последиците. На овој начин ФИФА ја поддржа УЕФА во борбата против одметнатите клубови.

„Денес сака да говорам за ковид-протоколите, за враќањето на фудбалот, за нашите деца и потребата да се занимаваат со спорт во безбедни услови. Сакав да говорам за местењето на натпревари, зло на кое мораме да го запреме. Сака да говорам за напредокот на Катар во организацијата на СП, за подготовките за СП за жени…Но, се се смени во последните два дена. Само една тема е важна. Читавме за војната и криминалот. Тешки зборови…Уште потешко е кога тие зборови се однесуваат на фудбалот. Зборува за проектот Суперлига. Сакам да бидам екстремно јасен. ФИФА е организација чии темел се цврсти принципи. Ние во ФИФА можеме само јасно и силно го оспориме основањето на Суперлигата. Таква креација ФИФА не може да поддржи“, порачал Инфантино на 45 Конгрес на УЕФА.

Првиот човек на ФИФА, потоа испрати јасна порака до клубовите кои решија да ја напуштат УЕФА и да основаат своја лига.

„Тие што решија да одат по овој пат ќе мора да се соочат со последиците. Ќе бидат одговорни за својот избор. Конкретно, или сте со нас или сте сами. Не можате малку да бидете овде, а малку на друго место. Тоа мора да биде јасно. ФИФА, исто како и УЕФА, е организација во која сите можат да ги кажат своите идеи и тие идеи да бидат разгледани. Но, членките секогаш мора да ги почитуваат институциите, првенствата и натпреварувањата“.