Динамо Загреб, со победата над Локомотива (2:0), се врати на првото место во хрватскиот шампионат. „Модрите“, со натпревар помалку имаат два бода повеќе од Осијек. Победата ја засени повредата на Аријан Адеми, кој најверојатно ќе го пропушти реваншот со Виљареал, во Лига Европа.

„Адеми има оток на стапалото. Ќе ги почекаме снимките, но прогнозите не се добри“, изјавил тренерот на Динамо, Дамир Крзнар.

Динамо, во четврток, ќе гостува во Виљареал. По првиот меч Шпанците имаат предност од 1:0.

Легендарниот италијански напаѓач, Антонио Ди Натале, ќе започне тренерска кариера. Италијанските медиуми објавија дека тој ќе седне на клупата на Карарес, клуб кој се натпреварува во Серија Ц.

Карарес, се наоѓа во серија од пет порази, на табелата се 15, со само бод повеќе од позицијата за плеј-аут.

Ди Натале, фудбалската кариера ја започна во Емполи, но славата ја стекна во Удинезе, чии дрес го носеше 12 години. За „Зебрите“, одиграл 385 натпреври, постигнал 191 гол. За Италија настапил на 42 натпревари, постигнал 11 голови.

Атлетико Мадрид одигра само 1:1 на гости кај Реал Бетис, за да остане на првото место во Ла лига, но сега првите три клуба на табелата се одделени со само два поени на осум кола пред крајот на сезоната, најавувајќи супер-интересна борба за трофејот.

Акцијата во мечот беше ограничена на првите 20 минути игра на „Бенито Вилјамарин“, откако прво Јаник Караско уште во петтата минута ги донесе гостите во водство, но 15 минути подоцна Кристијан Телјо израмни на 1:1. Двата клуба беа израмнети во остатокот од мечот, но не успеаја да најдат решение за голманите и одбраната.

Тимот на Диего Симеоне останува лидер во Шпанија, но откако имаа само две победи во последните шест меча, сега имаат 67 поени, само еден поен повеќе од градскиот ривал Реал Мадрид, кој пак по победата на саботното „Ел класико“ има уште еден поен предност пред Барселона. Веќе четвртопласираната Севилја е на дистанца – има 58 поени. Бетис, пак, се шести со 47 поени.