Аталанта пишува историја за своите фанови. Клубот од Бергамо во својот прв настап во Лигата на шампиони успеа да стигне до осминафиналето, и ако се смета првиот меч е многу блиску и до најдобрите осум, откако на „Сан Сиро“ успеа да ја декласира Валенсија со висока 4:1 победа.

Тотенхем на Жозе Мурињо пак, е пред елиминација, откако пред својата публика дозволи Ред бул Лајпциг да доминираат во играта и да го чекат реваншот со гостинска 1:0 победа.

Аталанта да потсетиме, настапите во ЛШ ги започна со три порази во низа – катастрофални 4:0 од Динамо Загреб на гости, домашен пораз од 1:2 од Шахтјор и 5:1 декласирање од Манчестер сити на гости. Меѓутоа, клубот од Бергамо покажа срце, победи во последните два натпревари и ги доби Валенсија, клуб со далеку поголемо искуство во европските натпреварувања во осминафиналето.

Италијанските медиуми шпекулираа дека речиси една третина од жителите на Бергамо се во Милано вечерва за најважниот меч во нивната клупска историја, и носени со овие очекувања, фудбалерите не разочараа.

Капитенот Папу Гомез уште во 12. минута со одлична асистенција го најде Ханс Хатебер за отварање на резултатот, а Јосип Иличиќ во финишот на полувремето со фантастичен гол зголеми на 2:0.  „Ла Деа“ (или божица, како што фановите сакаат да го именуваат својот тим), не застана тука. Ремо Фројлер во 57. минута зголеми на 3:0, а Хатебер со вториот гол во 63. минута веќе најави катастрофа за Валенсија. Утешно за шпанскиот тим е што Денис Черишев во 66. минута распали и успеа да постигне гол, така што сега на „Месталја“ ќе им биде потребна победа од „само“ 3:0 .

Тотенхем, пак, не успеа да добие ваква енергија од своите фанови, и дозволи на својот стадион Лајпциг целосно да доминира и да си замине во Германија со предност од 1:0. Ред бул доминираше од почетокот на мечот – Анџелино имаше удар во стативата веќе во втората минута, Вернер еднаш убаво го тестираше Љорис, а Лајпциг иако не постигна гол во првите 45 минути имаше дури 13 удари.

Во 56. минута, гостите добија пенал, откако Дејвис го „собра“ Лајмер, а Тимо Вернер беше сигурен од белата точка.

ЛИГА НА ШАМПИОНИ, 1/8 ФИНАЛЕ, 1.МЕЧ

Аталанта – Валенсија 4:1

Тотенхем – РБ Лајпциг 0:1

Манчестер сити со 2:0 го победи Вест хем во меч од Премиер лигата кој беше одложен поради бурата Кјара, во првата акција на „граѓаните“ по шокантната казна од 30 милиони евра и исфрлање од Лигата на шампионите во следните две сезони.

Де Брујне, кој е еден од фудбалерите за кои се шпекулира дека е блиску до излез од клубот посебно бидејќи неговата заработувачка е сврзана со резултатите на Сити во европските купови, повторно покажа дека е еден од најдобрите фудбалери од средниот ред во Премиер лигата, прво асистирајќи му на Родри во 30. минута, а потоа и самиот постигнувајќи гол во 62. минута.

Бидејќи Ливерпул се сигурно недостижни на првото место, главниот фокус на Сити е да се заддржи разликата пред третопласираниот Лестер, разлика која сега е четири поени. Вест хем пак, со поразот, остануваат на 18. место, во зоната за испаѓање со 24 поени, еден помалку од 17-пласираната Астон вила.

И покрај тоа што е светски рекет број 1 и според самата АТП, тенисер на изминатата деценија, Новак Ѓоковиќ признава дека е само трет кога се работи за поддршката на тениската публика, која очигледно ги преферира Роџер Федерер и Рафаел Надал.

„Прочитав многу работи дека публиката не ме сака, но немам таков впечаток, посебно надвор од теренот. Дури и да е вистина, зошто би сакал да додавам масло на огнот? Не сакам да побудувам негативни емоции. Немам негативни чувства за луѓето кои не навиваат за мене. Не сум горд од моите постапки во одредени моменти, кога ја губам самоконтролата. Правам грешки, но сакам да учам од нив. Никогаш не сакам да побудувам лоша енергија“, вели Ѓоковиќ.

Но, на крајот тој вели дека нема проблем со тоа што Федерер и Надал се попопуларни.

„Факт е дека повеќето фанови ги поддржуваат Федерер и Надал против мене, но тоа е поради тоа што тие двајца претставуваат во светскиот тенис. Тоа не значи дека ме мразат, ниту дека јас морам да ја свртам Србија против целиот свет само бидејќи помалку луѓе навиваат за мене во гренд слем финалињата“, додава Ѓоковиќ.