Анадолу Ефес е на една победа од обезбедување место на фајналфор-турнирот во Евролигата откако со 91:68 го декласира Реал Мадрид во „Синан Ерден доум“ во четвртокот за 2:0 водство во четвртфиналната серија.

Василије Мициќ имаше 23 поени со 5 тројки од 5 обиди и додаде 4 скока и 3 асистенции, а Шејн Ларкин помогна со 21 поен за третиот носител по регуларниот дел во Евролигата.

Разликата Ефес ја направи во третата четвртина по што Реал немаше одговор, особено без повредениот Валтер Таварес. Најдобар за Реал беше Треј Томпкинс со 14 поени, а 41-годишниот ветеран Фелипе Рејес имаше 6 поени за да стане најстариот стрелец во историјата на Евролигата.

Серијата се сели во Мадрид за третиот натпревар во вторник.

Алетико Мадрид ја врати првата позиција во Ла Лига и предноста од 3 поени пред градските ривали Реал Мадрид откако со 2:0 го совлада аутсајдерот Уеска, кој грчевито се бори за опстанок.

Човек на одлука беше Анхел Кореа, кој откако беше критикуван за слабите игри оваа сезона, во последно време е најдобриот играч во тимот на Диего Симеоне. Тој во 39. минута ја декласира одбраната на гостите за да го постигне својот трет гол во последните три меча, во кои има и две асистенции. Во 84. минута Јаник Караско зголеми на 2:0 за осигурување на триумфот.

Атлетико, сега, по 32 кола, има 73 поени на врвот на табелата, три повеќе од Реал Мадрид, шест пред Севилја и осум пред Барселона, иако Каталонците имаат два меча помалку. На другата страна на табелата, пак, Уеска останува во зоната за испаѓање на 18. место со 27 поени, еден помалку од Валјадолид и со ист број бодови како 19-пласираниот Елче. Еибар е последен со 23 поени.

Рома едвај успеа да извлече 1:1 реми со Аталанта во ситуација со играч повеќе, резултат што ги остава на 10 поени од место што води во Лигата на шампионите на само шест кола до крајот на Серија А.

Аталанта, пак, се враќа на третото место на табелата со 55 поени, исто колку и четвртопласираниот Јувентус и поен зад Милан.

Руслан Малиновски ги донесе гостите во водство на „Олимпико“ по убавата асистенција од Госенс во 26. минута, но „Ла Деа“ остана со играч помалку во 69. минута кога токму Госенс доби втор жолт картон. Веќе во 75. минута Брајан Кристанте израмни на 1:1.