Бројни фудбалски клубови во светот се простуваат од починатата аргентинска фудбалска ѕвезда, Диего Марадона. Тоа го стори и неговиот поранешен клуб, Барселона, клубот кој беше прва европска дестинација за Аргентинецот.

„Диего, никогаш нема да те заборавиме“ стои во објавата на Твитер.

Diego, we'll never forget you. 💙❤️

— FC Barcelona (@FCBarcelona) November 26, 2020

Марадона во Барса стигна по Светското првенство во 1982 година кое се играше токму во Шпанија. Во Каталонија се задржа две години, одигра 58 меча и постигна 38 гола.

Освен талентот, тој во Барселона покажа и склоност кон инциденти. Еден од најголемите беше токму во Барселона.

Учествуваше во неверојатна тепачка против играчите на Атлетик Билбао. Двете екипи, кои тогаш беа големи непријатели се состанаа во финалето на Купот на кралот во 1984 година. Во груб меч Атлетик славеше триумф со 1-0, но по последниот судиски свиреж настана хаос на теренот.

Марадона беше еден од главните протагонисти изведувајќи карате – удари:

Уште еден голем Аргентинец, Марсело Биелса го прокоментира животот на Диего Марадона кој вчера почина во својот дом. И популарниот „лудак“ кој е актуелен менаџер на Лидс Јунајтед верува дека Марадона е најголемиот во историјата на фудбалот.

„Се што правеше како фудбалер е убавина која е невозможно да се повтори. Марадона беше уметник затоа што воодушевувањето на неговите мајстории го надминува фудбалскиот терен. Постојат многу убави песни напишани во негова чест. Реакциите за неговата смрт се многу емотивни. На нас Аргентинците Диего многу ни значеше, кога го гледавме имавме чувство дека сме дел од фантазија“ рече Биелса.

Поранешниот македонски фудбалски репрезентативец, Бошко Ѓуровски за српски „Новости“ изјави дека имал големо среќа четирипати во кариерата да игра против Диего Марадона.

„Првпат го запознав на младинското СП во Јапонија, во 1979 година. Бевме деца, Аргентина ја победи Југославија со 1-0, а Диего издоминира на теренот како и на целиот шампионат. Имам и убав спомен, фотографија од дуел со Марадона, а ја добив дури кога бев помошник на Пикси во Нагоја“ – вели Ѓуровски.

Тетовецот се сеќава и на прочуениот гол на „Ел Пибе“ на „Маракана“ во Белград во 1982 година, во дресот на Барселона против Црвена Звезда кога 90.000 „Делии“ му аплаудирале на Аргентинецот.

„Трчав покрај него, немаше шанса да го сопрам, а потоа следуваше магија. Цел стадион стана и му аплаудираше. Беше импресивен, елегантен. Уште на загревањето се гледаше дека е создаден за фудбал, топката и тој беа едно. Бог го создал за да биде најдобар! За мене тој е најдобриот, па Кројф, Пеле и Роналдињо“ вели Бошко Ѓуровски.