Немилата случка во финишот на мечот Македонија-Австрија, во која Марко Арнаутовиќ упати навреди на национална основа кон македонскиот репрезентативец Езѓан Алиоски се тема на сите светски медиуми, како и неговото извинување (на македонски и албански јазик), и тврдењето дека не е расист.

Арнаутовиќ секогаш бил познат по својот темперамент на теренот, и дел од австриските медиуми тврдат дека тој бил налутен од прашањето на Алиоски „зошто не игра за Србија“, но сепак, ова не е првпат Австриецот со српско потекло (татко му е Србин, мајка му Австријка), да се најде на удар за сличен прекршок.

Во 2009 година, Арнаутовиќ, тогаш фудбалер на холандскиот Твенте, беше обвинет од дефанзивецот на Вилем Втори од Сиера Леоне, Ибрахим Каргбо, дека го нарекол погрден збор за црнци. Твенте тогаш стигна до 2:0 победа (а Арнаутовиќ беше стрелец на еден гол). Тогаш Арнаутовиќ помина без казна.

Останува да се види дали сега УЕФА ќе поведе дисциплинска постапка против Арнаутовиќ, откако и Фудбалската федерација на Македонија побара таква казна за австрискиот репрезентативец.

Арнаутовиќ се извини, но тврди дека не го навредил расистички Алиоски

Обвинителите во Сан Исидро, Аргентина, денеска го започнуваат сослушувањето на седумте медицински лица кои се обвинети за „убиство со намера“ околу смртта на фудбалската легенда Диего Марадона.

Сослушувањето требаше да почне на 31 мај, но беше одложено поради пандемијата на корона вирусот. Марадона почина на 25 ноември минатата година од срцев напад, две недели откако имаше операција на мозокот на 60 години. На 1 мај во извештајот на медицинскиот борд се утврди дека медицинскиот тим кој работел со Марадона пред неговата смрт се однесувал на „непримерен и невнимателен“ начин и дека тој не бил надгледуван 12 часа пред неговата смрт.

Прва пред обвинителите ќе се појави медицинскиот помошник, 38-годишниот Рикардо Омар Алмирон, кој бил одговорен за ноќните смени за Марадона и е еден од луѓето кои последни го виделе Марадона жив. Тој е обвинет дека не му помогнал во последните денови.

Покрај него, обвинет е и неврохирургот  Леополдо Луке, кој ја изврши операцијата на мозокот, како и психијатарот Агустина Козахов, која била одговорна за поранешниот фудбалер. Обвинети се уште двајца медицински помошници, уште еден доктор и еден психолог.

Семејството на Марадона подолго време бара „правда“ и тврди дека Луке е најодговорниот за неговата смрт. Сослушувањата ќе траат до 28 јули, по што судија ќе утврди дали ќе се оди на судење, а доколку се обвинети им се заканува затворска казна од 8 до 25 години затвор.

Калвин Филипс стана неочекувана фудбалска ѕвезда во Англија, откако фудбалерот на Лидс јунајтед беше прогласен за најдобар поединец при 1:0 победата над Хрватска во неделата, комплетирајќи ги неверојатните 12 месеци за 25-годишниот фудбалер, кој е пример за „дете“ од работничко семејство.

Пред 12 месеци, тој воопшто не беше во игра за место во англиската репрезентација, откако помогна Лидс, неговиот клуб од детството да влезе во Премиер лигата, а исто така ги отфрли најавите дека ќе игра за Јамајка, родната земја на неговиот татко. Сега, по првиот меч, тој од италијанските медиуми беше наречен „Јоркширскиот Пирло“, додека во Англија на сите насловни страници е токму неговиот лик.

Таткото на Филипс, Марк Филипс, во моментов отслужува затворска казна во затворот Вилстон, на само 350 метри од тренинг-центарот на Лидс јунајтед, и тој честопати го посетува и разговара преку телефон со него.

„Тој беше во затвор, па на слобода, па повторно во затвор. Имаше лошо друштво, дроги, тепачки, се што е можно. Лудо“, изјави неодамна Филипс.

Филипс покрај тоа, е во долгорочна врска со својата девојка Линдзи, од времето кога двајцата имаа по само 11 години. Таа до неодамна работеше во пицерија во Лидс, но сега откако Филипс заработува околу 50.000 фунти, му помага на Филипс и на неговата мајка Лиз.

„Парите во фудбалот се многу добри и тоа ми помага да се грижам за семејството. Затоа одам до максимум. Не сум имал многу кога растев, но мојата мајка и мојата баба секогаш ми го даваа тоа што ми беше потребно“, објаснува Филипс.