Барселона ја заврши неделата на совршен начин, совладувајќи го шпанскиот ривал Басконија со 71:57 во 28. коло во Евролигата, со што стана првиот клуб кој стигнал до 20 победи оваа сезона.

По чудниот 25:4 старт за домаќините, Басконија врати во уште полуда втора четвртина, за во третата четвртина дури и да поведе. Но, Никола Миротиќ беше на место, и во клучните моменти го врати водството ан Барса за да заврши со 18 поени и 10 скока.

Кори Хигинс имаше 13 поени, Адам Ханга додаде 9, додека кај тимот на Душко Ивановиќ, Јусуфа Фал беше најдобар со 12 поени.

Фенербахче, пак, стигна до петтата победа во низа на гости, откако со 90:86 триумфираше кај Асвел Лион, предводени од Нандо де Коло и неговите 24 поени. Олимпијакос, пак, со 94:79 ја победи Црвена звезда за прва евролигашка победа по два месеци.

ЕВРОЛИГА, 28.КОЛО

Химки – Алба Берлин 81:100 (25:20, 22:21, 20:27, 14:32)

Жалгирис – Армани Милано 64:69 (13:19, 19:15, 13:16, 19:19)

Олимпијакос – Црвена звезда 94:79 (30:19, 23:29, 22:19, 19:12)

Асвел Лион – Фенербахче 86:90 (18:20, 20:20, 22:19, 26:31)

Барселона – Басконија 71:57 (25:4, 8:22, 17:19, 21:12)

Револуционерната идеја на поранешниот тренер на Арсенал, Арсен Венгер за менување на правилата за офсајд е презентирана пред ФИФА, и тие се подготвени да ја тестираат, во потег кој може да донесе огромна трансформација на модерниот фудбал.

Венгер, откако ги одби сите понуди да стане тренер или спортски директор во некој голем клуб, почна да работи како шеф за глобален развој на фудбалот на ФИФА и подолго време лобира за промена на офсајд правилата.

Што е идејата на Французинот? Многу едноставно – тој би сакал да нема офсајд додека напаѓачот со било кој дел од телото кој може да го искористи да постигне гол е израмнет со претпоследниот противник.

Според „Тајмс“, правилото ќе биде тестирано во засега неименувана кинеска лига со можност да се применува глобално во блиска иднина. Како би изгледало тоа? Примерот на Рахим Стерлинг на следната фотографија покажува дека тој не би бил во офсајд, бидејќи неговата петица е израмнета со Џон Мекгин. Според сегашните правила, ова дефинитивно би било офсајд

Претседателот на ФИФА, Џани Инфантино е отпимист.

„Кога се работи за офсајдот, со менување на играта, со брзината на играта и со воведување на ВАР, јасно е кога е офсајд или не. Без ВАР, судиите сами го одлучуваа тоа. Со новото правило би виделе малку повеќе напаѓачки фудбал. Со предлогот на Венгер, напаѓачите ќе имаат повеќе простор и ќе се фаворизира напаѓачки фудбал. Прво мора да се тестира и да се види влијанието на играта. Ако е позитивно, тогаш зошто да не?“, вели Инфантино.

Околу кариерата на Златан Ибрахимовиќ има испреплетено толку многу митови, анегдоти, чудни работи, необјаснети работи, така што настапот на музичкиот фестивал Санремо можеби беше само една од епизодите. Но, начинот на кој стигна таму, повторно носи една приказна во која би било тешко да се поверува доколку немаше докази.

Ибрахимовиќ пееше заедно со тренерот на Болоња, Синиша Михајловиќ на славниот фестивал, но за малку немаше да стигне таму – сообраќајот од Милано до Санремо бил толку густ, што Златан последните 60 километри ги поминал на мотоцикл со еден локален возач, инаку страстен навивач на Милан.

„По три часа во колата, му кажав на возачот да ме пушти, сопрев еден мотоциклист и го прашав дали ќе ме однесе до Санремо. Знам дека звучи неверојатно, и затоа снимив видео, бидејќи немаше да ми верувате“, изјави Златан.

„Радио Монте Карло“ го пронајде мотоциклистот, кој се идентификуваше само како Франко.

„Се враќав дома, и додека бев во гужвата, видов црно комбе. Имаше двајца внатре и еден личеше на Ибрахимовиќ. Си реков, ова мора да е Ибра. Возачот го спушти прозорецот и ме праша: ‘Ибра прашува дали може да го однесеш до Санремо’. Секако! Имав резервна кацига под седиште. Се јавив на сопругата и не ми веруваше дека ќе го возам Ибрахимовиќ. Тој дури сакаше да вози самиот, но јас му кажав дека јас сум возачот. Ми кажа дека ќе ми прати дрес бидејќи сум навивач на Милан“, открива Франко.

60 km in moto per raggiungere @SanremoRai: la clip è su #RaiPlay ➡️https://t.co/YmmduZpfTp
⚡️Il video di @Ibra_official ⤵️#Sanremo2021 @RaiUno pic.twitter.com/l1HHkJ4Fq1

— Ufficio Stampa Rai (@Raiofficialnews) March 4, 2021