Спорт
Сантош си ја отвори душата: Роналдо ми е лут, повеќе не зборуваме
Не помина цела година откако Фернандо Сантош си замина од селекторската функција на португалската репрезентација. Иако во меѓувреме стана, но и престана да биде селектор на Полска, новинарите на португалскиот портал „А Бола“ решија да го „донесат“ на големо интервју.
Сантос и понатаму е португалскиот тренерски бренд, човекот кој за осум години ги доведе до титулата европски првак и освојувач на Лигата на нации. Посебна приказна се врти околу Кристијано Роналдо со кој, како што самиот кажа, не разговарал од крајот на Светското првенство, кога и самиот си замина.
„Јас и тој повеќе не разговараме. Долга е приказната, не знам ни точно од кој ден. Но, знам дека не сме разговарале откако дојдовме од Катар“, ја започна својата приказна 69-годишниот тренер.
Можеби причината е осминафиналниот натпрвар со Швајцарија на СП во Катар? Сантош реши да го остави Роналдо на клупата за резерви, а неговата замена Гонсало Рамос постигна три гола…
„Не, нема врска со тој натпревар. Имав силна врска со Кристијано, а не само деловна. Се запознавме во Спортинг кога имаше 19 години. Тој однос достигна уште повисоко ниво откако тој беше повикан во репрезентацијата, а јас станав селектор. Бевме како татко и син, или како постар и помал брат. Нема врска со ништо од Светското првенство. Направив потег за кој мислев дека е добар, стратешки во тоа време. Мора да го разберете тоа“, изјави Сантос.
„Неговата 2022 година не беше најдобра. Да, реков дека е најдобар на светот, но имаше очајни, ужасни шест месеци. Прво, доживеа семејна трагедија, која имаше големо влијание врз него и во спортот. Не ги мина подготовките, не играше два месеци. Потоа се врати во Манчестер, каде што воопшто не беше искористен. Физички, тој сè уште беше на врвно ниво, никогаш нема да престане да биде, а јас го познавам подобро од кој било. Но, кога беше во прашање играта, тој беше на најниско ниво. Воопшто немаше ритам.
Дали и би го направиле истото денес?
„Да! Морав да мислам на тимот на СП, а не на поединецот. Според мене оставањето на клупата за Швајцарија беше стратешка одлука, најдобра за сите во тој момент. Одлуката не беше лесна. Тоа не значеше дека Кристијано нема да дојде од клупата или да го игра следниот натпревар како што беше, но јас не го ставив во игра против Швајцарија речиси до крајот бидејќи ни одеше одлично. Но, ако требаше, ќе влезеше и ќе го решеше натпреварот“.
Португалија ги победи Швајцарците со 6:1, но во четвртфиналето беше елиминирана од Мароко.
„Верувам дека јас и Кристијано ќе се сретнеме и ќе разговараме еден ден. Не се каам за моите одлуки, знам дека некои работи можеби го повредиле. Можеби и денес е лут поради тоа. Се надевам дека не, дека се ќе се смени. Јас сум трпелив, сигурен сум дека тоа ќе се случи“ изјави Сантос.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Албанија и Србија со заедничка кандидатура за младинското ЕП во 2027 година
Фудбалските сојузи на Албанија I Србија поднесоа официјална кандидатура за организација на Европското првенство за фудбалер до 21 година во 2027 година.
Информацијата ја објави албанскиот сојуз.
„Албанскиот фудбалски сојуз соопштува дека се пријави за организација на завршниот турнир ЕУРО 2027 за играчи до 21 година. АФЛ ќе соработува со Фудбалскиот сојуз на Србија, бидејќи нашата земја не ги исполнува условите да биде домаќин на сите натпревари на ЕУРО 2027 година“, соопштија од Тирана.
Подетални информации се официјализирани на веб-страницата на албанската куќа на фудбалот.
„По успешното домаќинство на првото финале на Конференциската лига на УЕФА во Тирана во 2022 година и добивањето на организацијата на ЕП за кадети во 2025 година, АФЛ бара да биде домаќин на уште еден голем европски фудбалски настан.
Албанија е еден од главните кандидати за домаќин на финалните натпревари на Европското првенство за млади репрезентации во 2027 година. АФЛ испрати барање до УЕФА Албанија да биде една од земјите-домаќини на завршниот турнир на ова натпреварување.
Бидејќи не се исполнети условите за бројот на стадиони потребни за нашата земја да биде домаќин на сите натпревари на Европското првенство, АФЛ ќе соработува со Фудбалскиот сојуз на Србија за заедничка организација на финалната фаза на ЕУРО 2027 година.
Ова е несомнено многу амбициозен проект, кој би ја ставил Албанија во центарот на фудбалското внимание на целиот континент“.
Фудбалскиот сојуз на Србија засега не се огласил по ова прашање.
Наскоро се очекува да пристигне потврда од Белград.
Спорт
Кубарси го продолжи договорот со Барселона – Откупната клаузула изнесува 500 милиони евра
Младиот шпански фудбалер Пау Кубарси (17) го продолжи договорот со Барселона до 2027 година, објави клубот. Откупната клаузула во договорот изнесува 500 милиони евра.
Пау Кубарси, кој беше вклучен во првиот тим од тренерот Чави Ернандез минатиот јануари, доживеа метеорски подем и се етаблира како стартер практично од своето професионално деби.
Каталонецот беше повикан во шпанската репрезентација по само десет одиграни натпревари во прифесионалната кариера, а веројатно ќе биде и во составот на Шпанија на Европското првенство во Германија.
Спорт
Скариоло го продолжи договорот со Шпанија
Италијанскиот стручњак Серхио Скариоло го продолжи договорот со Кошаркарскиот сојуз на Шпанија. Ќе остане на функцијата селектор до 2028 година.
Скариоло е селектор на Шпанија од 2009 година, со двегодишна пауза од 2013 до 2015 година.
Со репрезентацијата на Шпанија, Скариоло ја освои титулата светски шампион (2019) и четири пати беше европски првак (2009, 2011, 2015 и 2022 година), од ОИ има сребро во 2012 година и бронза во 2016 година.
Кошаркарите на Шпанија се уште не се пласирале на Олимписките игри во Париз. Пласманот ќе се обидат да го обезбедат на квалификацискиот турнир кој од 2 до 7 јули ќе се игра во Валенсија.