Ерлинг Халанд, минатото лето реши да се пресели во Манчестер сити. „Граѓаните“ ја активираа неговата откупна клаузула од 60 милиони евра. Менаџерката Рафаела Пиминето откри зошто Халанд ги одбил Реал, ПСЖ, Манчестер јунајтед, Челси и ја прифатил понудата на актуелниот англиски шампион.

“Знаете, тој потекнува од фудбалско семејство. Неговиот татко играше за Манчестер сити и има фотографии од Ерлинг како го носи тој дрес како дете. Мислам дека причините беа лични. Мислам дека тој сакаше да ја доживее Премиер лигата”, изјави таа во интервју за шпански „Ас“.

Таткото на Ерлинг, Алфи Халанд играше за Сити од 2000 до 2003 година. Ерлинг е под договор со клубот до летото 2027 година. Сезонава веќе постигна 25 гола во Премиер лигата на само 19 одиграни натпревари.

Трансферот на Енцо Фернандез во Челзи не ја израдува само Бенфика, туку и Ривер Плата. Челси го собори англискиот рекорд со трансферот од 121 милион евра за играчот од средниот ред од Аргентина.

Бенфика ја направи зделката на векот бидејќи пред седум месеци, за трансферот на Фернадез, без бонуси, издвои само 10 милиони евра.

Сепак, трансферот вклучуваше клаузула од 25 проценти од следната продажба на 22. годишниот играч за врска.

Така Ривер без учество во тој трансфер заработи уште 30 милиони евра од преселбата на Фернандез во Лондон, а вкупно на негово име заработи 40 милиони.

Што се однесува до Бенфика, од 121 милион, на португалскиот гигант му останаа уште 91, а сметајќи ги вложените пари за доаѓањето на Фернандез од Буенос Аирес, тие остварија нето добивка од 81 милион евра.

Фернандез постигна четири гола и забележа шест асистенции за Бенфика оваа сезона, но блесна на Светското првенство каде беше прогласен за најдобар млад играч на турнирот.

Новак Ѓоковиќ по десетти пат во кариерата го освои Австралија опен. Српскиот тенисер го победи Стефанос Циципас со 6:3, 7:6 (4), 7:6 (5) и со тоа го израмни рекордот на Рафаел Надал од 22 победи на Грен слем турнирите. Ѓоковиќ со оваа победа обезбеди враќање на првото место на АТП-листата.

Ѓоковиќ во Мелбурн допатува со сериозна повреда, со која се здоби во полуфиналето против Данил Медведев, на турнирот во Аделаида.

Повредата му правеше проблеми во првите три кола. Повредата како да исчезна кога Ѓоковиќ во лекарскиот тим ја ангажираше докторката Маријана Ковачевиќ.

Поради тоа се ојавија сомнежи дека ја лажирал повредата, па Ѓоковиќ изјавил дека е особено навреден поради тоа и дека ќе ја покаже снимката која ја потврдува неговата приказна.

На страната на Ѓоковиќ застана директорот на Австралија опен, Крег Тајли, кој за медиумите објасни дека Ѓоковиќ има пукнатина од три сантиметри во задната ложа:

„Многу предизвици се околу Новак бидејќи добива лоша репутација. Но, на крајот, мислам дека никој не може да го доведе во прашање неговиот атлетизам“, рече Тајли.

„Имаше пукнатина од три сантиметри. Апсолутно, ја видов снимката, лекарите ќе ја кажат вистината. Имаше многу шпекулации за тоа дали е вистина или не. Тешко е да се поверува дека некој може да го направи ова со таква повреда Тој е неверојатен, се справи со тоа исклучително професионално. Тој е толку фокусиран на она што го прави. Секоја минута од секој ден. Што јаде, пие, што прави и како го прави тоа. Без дефекти, ниту ментално, ниту во било што што прави. Помина низ многу нешта за да ја освои 10. титула на Австралија Опен и мислам дека тоа никогаш нема да се повтори“, заклучи тој.