Возачите на Формула 1 го пофалија новиот светски шампион Ландо Норис од Мекларен.

Посебно внимание привлече изјавата на Карлос Саинц од Вилијамс, кој рече дека Британецот докажал дека титулата може да се освои кога си „добар човек“, наместо „суров и опасен“.

Норис го освои својот прв шампионат во Формула 1 во неделата, завршувајќи трет во последната трка од сезоната на Големата награда на Абу Даби.

Британскиот возач ја заврши сезоната со два бода предност пред четирикратниот шампион по ред Макс Fерстапен од Ред Бул, кој победи во Абу Даби.

Саинц беше прв тимски колега на Норис кога Британецот дојде во Мекларен како 19-годишник, тие возеа заедно за тимот во 2019 и 2020 година и развија пријателски однос и надвор од патеката.

„Му посакувам среќа. Како возач бидејќи отсекогаш бил екстремно брз, побрз отколку што луѓето му давале признание, екстремно талентиран. Во првите години во Мекларен, видов човек кој има брзина да биде повеќекратен светски шампион, ако станува збор само за брзина. Тој многу ги разви своите вештини и сега е светски шампион“, изјави Саинц за Скај.

„Повеќе од сè, сум среќен за него како личност, бидејќи е возач кој не следи одредени стереотипи за светски шампион, секогаш останал верен на себе, многу искрен, отворен за своите проблеми и им докажал на сите дека може да бидеш светски шампион ако си добар човек, не мора да бидеш суров или опасен“, додаде шпанскиот возач.

Саинц се надева дека 26-годишниот Норис нема да се промени.

„Среќен сум за него, се надевам дека ќе остане ист, дека нема да го „крене носот“ сега кога е светски шампион и дека ќе продолжи да биде свој, или дури дека ќе може повеќе да се опушти и повеќе да ужива во Формула 1“, рече Саинц.

Норис стана 11-тиот британски возач кој ја освои Формула 1 и првиот во Мекларен откако Луис Хамилтон ја освои својата прва титула во 2008 година.

Хамилтон е седумкратен светски шампион, рекордер по број на победи со 105 и рекордер по број на пол позиции со 104.

„Навистина, навистина сум среќен за него. Освојувањето на првата титула е навистина посебно. Британија продолжува да произведува одлични возачи. Исто така, знам како е кога влегувате во оваа трка и се борите за првата титула, тоа е исклучително возбудливо“, рече возачот на Ферари, Хамилтон.

Норис се бореше за титулата со Ферстапен, а Холанѓанецот му честиташе за успехот.

„Тој имаше многу добра сезона. Всушност, тоа беше тешка битка меѓу него и Оскар Пјастри и во еден момент се вклучив во борбата. Освојувањето на првата титула е секогаш супер емотивно. Многу е посебно бидејќи секој на патеката секогаш сонува за тој момент. Се надевам дека ќе ужива со своето семејство и секако со тимот“, рече Ферстапен.

Foto/ freerangestock

Бразилскиот фудбалер, Нејмар повторно го очекува долга пауза. Нејмар мора да го оперира коленото, а се уште не е познато колку долго ќе отсуствува од фудбалските терени.

Нејмар, доби ултиматум од новиот селектор на Бразил, Карло Анчелоти, дека ќе патува на Светското првенство, само ако целосно се опорави.

Бразилецот призна дека ќе се подложи на операција на коленото, по натпреварот со Крузеиро, каде Сантос славеше и со тоа си го обезбеди опстанокот во друштво на најдобрите.

„Затоа дојдов, да помогнам колку што можам. Ова беа тешки недели за мене. Сакам да им се заблагодарам на сите што ми помогнаа. Да не беа тие, немаше да можам ниту да ги играм сите овие натпревари поради повреди. Сега ќе одморам малку, а потоа ќе морам да се оперирам на коленото“, рече Нејмар.

Поранешниот играч на Барселона и ПСЖ рече дека достигнал една од најниските точки во својата кариера.

„Порано одев на терапија кај психолог, но не затоа што бев во лоша состојба, туку затоа што сакав да се подобрам, да бидам уште подобар. Но, сега за прв пат го допрев дното. Мислам дека сум психолошки силен, дека можам да се справам со многу, но овој пат не успеав“, рече Нејмар.

foto/ freerangestock

Наполи е принуден да бара нов играч од средниот ред во зимскиот преоден рок по сериозната повреда на клучниот играч Кевин Де Брујне, кој би можел да го пропушти остатокот од сезоната.

Тренерот Антонио Конте го постави доведувањето на нов играч од средниот ред како приоритет, а на врвот на неговата листа на желби е Коби Маину од Манчестер Јунајтед, додека Сунгуту Магаса од Вест Хем се споменува како алтернатива.

Иако минатата сезона ја освои титулата во Серија А, Конте дополнително го засили средниот ред ова лето со спектакуларниот слободен трансфер на легендата на Манчестер Сити, Кевин Де Брујне.

Белгискиот играч од средниот ред имаше одличен почеток на сезоната и брзо се адаптираше, но во октомври доживеа сериозна повреда во победата од 3:1 над Интер.

Прегледите покажаа висок степен на руптура на бицепсот на феморисот во горниот дел од десната нога.

Се шпекулира дека рехабилитацијата на Де Брујне ќе трае до крајот на февруари или почетокот на март. Ситуацијата е уште позагрижувачка бидејќи тој оперираше истиот мускул во 2023 година, поради што го пропушти поголемиот дел од сезона во дресот на Сити.

Конте мора да бара нов играч од средниот ред, и заедно со Маину, кој падна во втор план во Манчестер Јунајтед, на листата се наоѓа и Сунгуту Магаса од Вест Хем.

Додека Маину останува примарна цел, Магаса се разгледува како алтернатива. Според новинарот Николо Чекарини од „Тутомеркато“, Магаса е поевтина опција бидејќи би можел да биде достапен за само 15 милиони евра.

Поранешниот играч на Монако се приклучи на Вест Хем минатото лето и оваа сезона има одиграно осум натпревари во Премиер лигата, од кои само четири како стратер.

Foto/ freerangestock