Завршниот турнир на деветтата по ред регионална ракометна СЕХА лига ќе се одржи од 4. до 6. септември во Задар, соопштија организаторите.

Турнирот беше планирано да се одржи на почетокот на април, но беше одложен поради пандемијата на коронавирусот.

Сигурно место во Задар има за хрватскиот шампион Загреб и за белорускиот првак Мешков Брест.

За останатите две позиции ќе се борат Војводина против фаворитот Веспрем и скопски Вардар кој за противник ќе ја има екипата на Нексе.

Актуелниот европски и македонски шампион – Вардар освои три СЕХА титули во низа и има шанса да дојде до четвртата, вкупно шеста за „црвено-црните“.

Дефанзивецот на Јувентус, Матијс де Лихт го чека повеќемесечна пауза по операцијата на рамото, пренесуваат медиумите на „Чизмата“.

Холанѓанецот соопшти дека летово мора да оди на операција поради проблемите кои ги има уште од ноември минатата година. Операцијата најверојатно ќе се изврши оваа недела, во Рим.

Дел од италијанските медиуми пишуваат дека опоравувањето може да трае 2 до 3 месеци. Тоа значи дека одбранбениот фудбалер ќе го пропушти стартот на новата сезона кој е закажан за 19 септември.

Де Лихт дојде во Јуве од Ајакс минатото лето за 75 милиони евра. За „Старата дама“ одигра 39 меча и постигна 4 гола.

Германската фудбалска легенда Лотар Матеус вели дека Роберт Левандовски е „најдобриот фудбалер на светот“ во моментов пред Лео Меси, и е негов вистински наследник. Поради тоа, јасно е дека Баерн Минхен е фаворит пред четврт-финалето од ЛШ против Барселона.

Левандовски стигна до 53 гола во 44 меча откако постигна два гола во 4:1 победата на Баерн над Челси во саботата, додека Барселона со 3:1 го победи Наполи, во меч во кој Меси постигна фантастичен соло гол. Матеус вели дека предноста е кај Германците.

„Меси се соочува со својот наследник како најдобар фудбалер на светот – Роберт Левандовски. Тој е најдобар фудбалер, не само најдобар напаѓач. Оваа Барса не е истата како во минатото. Секако, го имаат Меси, и фудбалер како него знае да направи генијален потег. Но сам, нема да може ништо против Баерн. Барселона воопшто не ме плаши“, вели Матеус за „Билд“.