Извршиот директор на фудбалскиот клуб Милан – Иван Газидис вели дека изградбата на нов стадион е клучна за успешна иднина на клубот од Милано.

Проектот за изградба на новиот стадион го сподели со навивачите, а Газидис смета дека „изградбата на нов стадион е нужна за најсилната екипа во Италија“.

Поранешниот сопственик на „Росонерите“ – Силвио Берлускони порано изјави дека се противи на рушењето на култниот „Сан Сиро“.

Газидис додава дека разбира оти овој стадион е посебно место, но истакнува дека е потребно да се има храброст, пренесуваат италијанските медиуми.

„Чувствата постојат и не можат да се доведат во прашање. Спомените од стадионот ќе останат засекогаш, никој не може да ги избрише, тоа е невозможно. Имаме се што ни треба – фудбал, луѓе, навивачи. Гледам блескава иднина, само треба да се има храброст. Изградбата на новиот стадион е темелен чекор ако сакаме повторно да бидеме во врвот на светскиот фудбал“ заклучи Газидис.

Инаку, „Сан Сиро“ е изграден во 1926 година, а оттогаш четирипати е реновиран.

На него своите домашни мечеви ги игра и тимот на Интер.

Фудбалерот на лондонски Челси, хрватскиот репрезентативец Матео Ковачиќ е заразен со ковид 19, потвди денеска неговиот тренер Томас Тухел.

„Беше на тренинг во понеделникот, денес дозна дека е позитивен, па сега е во изолација. Бев свесен дека тоа може да се случи затоа што има многу такви случаи во екипите и не сум среќен поради тоа. Не само како тренер, туку и како човек. Но тоа е реалноста, мораме да се прилагодиме и да ги зачуваме луѓето здрави“ изјави Тухел.

Утре „сините“ ја играат последната средба од групната фаза во ЛШ против Зенит, но од порано го обезбедија пласманот во осминафиналето.

Баерн Минхен утре од 21 часот на својата „Алијанц арена“ игра против Барселона во последното коло од групната фаза во ЛШ. Каталонците мораат да победат во Минхен ако сакаат со сигурност да се пласираат во нокаут фазата.

Сепак, тренерот на баварскиот клуб Јулијан Нагелсман им остави порака на фановите на Бенфика чиј клуб исто така гледа можност во последното коло да се „протне“ во следната фаза. Нагелсман порача:

„Ќе го изведеме најдобриот состав. Поздрав за Лисабон, не се грижете“.

Младиот германски стратег имаше пофалби за екипата на Барселона, но порача дека Баерн ќе оди на трите бода.

„Барселона мора да не победи за да помине понатаму, ќе мораат да играат добро и да дадат се од себе. Добра екипа се, имаат играчи од светска класа. Им треба резултат и ќе дадат се од себе. Тоа мечот ќе го направи добар. Овде не се работи за тоа дека сакаме некого да нокаутираме, ги сакаме трите бода“ изјави Нагелсман.

Барса до нокаут фазата може да дојде и во случај на реми, па дури и на пораз, ако Бенфика не го победи Динамо Киев на домашен терен.

Во случај Бенфика да освои 3 поени со отпишаниот украински клуб кој нема шанси ниту за третото место, а Барса одигра нерешено во Минхен, во групата Е две екипи ќе имаат ист број на бодови, и тогаш во предност би била португалската екипа поради подобар меѓусебен скор.

Во Каталонија, пак, се надеваат на „чудо“ во Минхен знаејќи дека Баерн на утрешниот меч ќе биде без Горецка, Гнабри, Чупо-Мотинг, Сабитцер, Кимих и Станишиќ.