Францускиот стратег Зинедин Зидан одбива да седне на кормилото на Пари Сен Жермен, пренесува „Телефут“. Легендата на францускиот фудбал е прв избор за наследник на Покетино, но Зидан, сепак, ја одбил понудата на раководството на „светците“.

Откако ги разрешија дилемите со Килијан Мбапе, кој потпиша нов тригодишен договор, сега ќе се посветат кон избор на нов тренер. Исто така, досегашниот спортски директор Леонардо доби отказ и се чека официјална потврда, а како негов наследник се споменува Луис Кампос.

Наполи одбил да го продаде напаѓачот Виктор Осимен на Арсенал, откриваат италијанските медиуми. Раководството на „наполитанците“ ја одбило понудата на англискиот клуб во висина од 90 милиони евра.

Претседателот на Наполи, Аурелио де Лаурентис процени дека 23-годишниот Нигериец вреди 110 милиони евра.

Менаџерот на Арсенал, Микел Артета, сака да привлече двајца напаѓачи во својот тим откако Пјер-Емерик Обамејанг си замина во јануари, а најверојатно по завршувањето на сезоната клубот ќе го напушти и Александре Лаказет. Иднината на Еди Нкетија е исто така неизвесна.

Наполи беше убедлив на гостувањето кај Специја, победи со 0:3 и на убав начин ја заокружи сезоната во Серија А. Тимот на Елиф Елмас не успеа во трката за титулата, но, сепак, успеа да оствари пласман во Лигата на шампионите.

Матео Политано во четвртата минута донесе предност, а Пјотр Зиелински во 25.минута зголеми на 0:2. Диего Деме беше стрелец на третиот гол за „наполитанците“ во 36.минута од мечот.