Тренерот на Барселона, Роналд Куман, блескал од задоволство по убедливата победа (4:0), над Динамо во Киев, во четвртото коло во Лигата на шампионите.

Кума за овој натпревар реши да ги одмори Лионел Меси и Френки Де Јонг, тие не беа со тимот во Киев, а Антоан Гризман натпреварот го започна од клупата за резерви.

Два гола во Киев постигна Мартин Брејтвајт, а по еден Сержињо Дест и Антоан Гризман.

„Ваква Барселона сите сакаме да гледаме. Момците доминираа во текот на целиот натпревар, можат да бидат горди од начинот на кој што го одиграа мечот. Можеби во првиот дел не бевме ефикасни, но задоволен сум како игравме“, рекол Куман и дополнил.

„Гризман, поради мал физички проблем, мечот го започна од клупата за резерви, моравме да бидеме претпазливи. Многу е значајно да ги одмориме клучните фудбалери и во исто време да им пружиме шанса на некои од младите кои досега не играа. Младиот Мингуеза покажа дека можеме да сметаме на него во иднина“.

Барселона со победата над Динамо и теоретски обезбеди место во нокаут-фазата во Лигата на шампионите. Тимот на Куман, викендов ќе игра против Осасуна во Ла Лига.

Новинари, навивачи, поранешни фудбалери не ги штедат критиките за формата во која се наоѓа Лионел Меси. На оваа тема зборувал и легендарниот Холанѓанец, Марко ван Бастен. За „Зиго Спорт“, тој рекол порачал дека „тоа не е Меси“.

„Не ми се допаѓаат неговите настапи. Тоа не е тој. Очигледно е дека не е задоволен од ситуацијата во Барселона“, рекол Ван Бастен и дополнил.

„Не ми се допаѓа како делува на теренот. Не треба да се крие тоа, игра лошо. Тој и Гризман играат како слаткари“.

ПСЖ, синоќа, го победи Лајпциг со 1:0 во Лигата на шампионите, со што си ги зголеми шансите за пласман во нокаут-фазата. Мечот го реши Нејмар, кој во 11. минута погоди од белата точка.

Лајпциг во текот на целиот меч беше подобар тим на теренот, меѓутоа неколку шанси што ги создаде не успеа да ги реализира. Тренерот Јулијан Нагелсман е незадоволен од одлуката да биде досуден пенал за ПСЖ. Судиската одлука ја нарекол комедија.

„Мислам дека ПСЖ немаше шанси во играта, а пеналот е чиста комендија. Тажно е да се донесе ваква одлука на ова ниво. Тоа беше чисто актерство, немаше никаков контакт. Судиите од ВАР-собата, веројатно, гледаа некој друг натпрвар“, рекол Нагелсман.

По овој пораз, Лајпциг се наоѓаат во тешка ситуација за пласман во осмина-финалето. Германскиот тим има шест поени, колку што има и ПСЖ, но францускиот шампион има подобар меѓусебен дуел.

До крајот на натпреварите во групата Лајпциг ќе гостува кај Башакшехир и ќе го пречека Манчестер јунајтед.

„Сега не сме во добра позиција во групата, мораме да победиме на последните два натпревара и да се надеваме дека ПСЖ во последните две кола нема да забележи две победи“, заклучил најмладиот тренер во Лигата на шампионите.