Реал Мадрид со 2-0 славеше во Сан Себастијан, против екипата на Реал Сосиедад блаодарение на резервистот Лука Јовиќ.

Српскиот репрезентативец по цели 22 месеци конечно се запиша во листата на стрелците во Кралскиот дрес, а вечерва беше и асистент на првиот гол за својот тим.

Во 16 минута Карим Бензема се повреди, па Јовиќ ја доби довербата на Анчелоти.

Во вториот дел, на асистенција на Јовиќ, во 47 минута Винисиус погоди за 1-0, а самиот Јовиќ 10 минути подоцна го постави конечниот резултат.

Реал Мадрид сега со 39 бода е на +8 од второпласираната Севилја, но Андалузијците е и со меч помалку од ривалот.

Наполи киксна на домашен терен против Атланта во последниот саботен меч од 16. коло во Серија А.

Тимот каде што настапува македонскиот фудбалски репрезентативец Елиф Елмас загуби на „Диего Марадона“ со 3-2 од пулените на Гасперини. За екипата од Неапол ова беше втор пораз во последните 5 кола, а ако тука се вклучат и двете нерешени средби против Сасуоло, односно Верона станува јасно дека четата на Лучијано Спалети е во мини-криза.

Причина за сето тоа секако е големиот број отсутни фудбалери, вечерва ги немаше Инсиње, Осимхен, Кулибали, Руиз, Манолас…

Први на мечот поведоа гостите од Бергамо, со голот на Малиновски уште во 7. минута.

Во 40. минута Зиелински се погрижи Наполи на полувреме да замине со нерешен резултат.

Во вториот дел, уште на стартот Мертенс погоди за домашно водство од 2-1. Но следуваше пресврт.

Најпрво Демирал во 66 минута израмни на 2-2, а конечните 3-2 за Аталанта ги постави Фројлер во 71 минута.

Наполи по овој меч останува третопласиран со 36 бода, два помалку од лидерот Милан и 2 повеќе од четвртопласираната Аталанта.

Манчестер Сити е нов лидер на табелата во Премиерлигата откако вечерва „граѓаните“ со 3-1 славеа на гостувањето кај Вотфорд.

Избранците на Пеп Гвардиола го искористија денешниот кикс на Челси кај Вест Хем, па по дванаесетиот сезонски триумф собраа 35 бода.

Првиот гол на „Викариџ Роуд“ падна по само 4 минути игра. Стрелец за 0-1 беше Стерлинг. До крајот на полувремето феноменалниот вечерва Бернардо Силва погоди за поубедливи 0-2 за Манчестер Сити.

Во второто полувреме домашните тргнаа поофанзивно, ама Бернардо Силва со својот втор гол го однесе мечот во убедливи 0-3.

До крајот пулените на Раниеру успеаја само да постигнат почесен погодок, во 78 минута преку Хернандез.