Дејмон Хил вели дека дури откако се пензионирал сфатил дека „недуховитиот и стегнат“ Михаел Шумахер е човек „кој вреди да го запознаеш“.

Британецот и Шумахер имаа легендарно ривалство во 1990-тите, во кое неколку пати се судрија на патеката, од кои најпозната трка останува Австралиското ГП во 1994, кога во борба за титулата, Шумахер го истурка Хил од патеката и двајцата се откажаа, а Шумахер ја освои првата од седумте светски титули. Ова не беше рецепт за пријателство, и Хил вели дека дури во 1999 го видел Шумахер како нешто повеќе од обичен ривал.

„Чудно, но кога се пензионирав и му правев интервју во Сузука за еден магазин сфатив колку забавен човек е. Се пензионирав и тој го спушти гардот и одеднаш изгледаше како човек кого вреди да го запознаеш. Како професионалец беше сосема различен. Недуховит и стегнат човек кој не дава ништо. Можеше да ги ’сотре’ своите противници. Но, сите големи беа такви. Сена не беше лесен човек, на пример. Новата генерација е порелаксирана“, вели Хил во интервју за „Дејли мејл“.

Тој исто открива дека му било тешко кога слушнал за несреќата на скијање по која Шумахер доби оштетување на мозокот, а кога со него беше неговиот син. Хил го загуби својот татко, светскиот шампион Греем во 1975, кога тој падна со авионот кој го пилотираше. Дејмон имаше 15 години тогаш.

„Бев навистина вознемирен кога ги слушнав вестите, посебно бидејќи таму беше со неговиот син Мик. Јас сакав да имам врска со мојот татко кога раснев, но тоа не се случи поради трагедија, а сега Мик проаѓа низ истото. Не сум бил да го видам, не сум прашал. Премногу е приватна работа. Не го познавам Михаел толку добро“, додава Хил.

Луис Хамилтон ги загрижи своите фанови на социјалните мрежи, откако на Инстаграм постави „загрижувачка“  порака дека е подготвен да се „предаде“ од светот.

Британецот во неделата заврши трет на Јапонското ГП, но е на чекор до шестата светска титула, но неговата порака очигледно нема никаква врска со Формула 1. Пред да ја објави приказната на Инстаграм, тој имаше неколку постови за екологија и за веганство, две каузи кои во последно време му се блиски.

„Искрено, блиску сум да се предадам од сè. Целосно да е затворам. Зошто да се грижам, кога светот е во таква мешаница, а луѓето воопшто не се грижат. Ќе искористам некое време далеку да ги соберам моите мисли. Благодарност до тие од вас кои уште се грижат за светот“, напиша Хамилтон.

Повеќе од 20 полицајци денеска влегоа во просториите на Бугарскиот фудбалски сојуз (БФС) во Софија, надоврзувајќи ги проблемите на бугарскиот фудбал по скандалозниот меч со Англија.

Откако претседателот на Сојузот, Борислав Михајлов, поднесе оставка по расистичките и нацистичките инциденти на квалификацискиот дуел од Евро 2020, следуваше рацијата која според јавното обвинителство е дел од истрага за корупција.

„Се работи за спортски злосторства. За корупција поврзана со работата на судиската комисија на БФС и именувањето судии. Истрагата е во тек“, велат од обвинителството.

56-годишниот Михајлов, кој беше дел од славната бугарска фудбалска генерација која стигна до полуфиналето на СП во 1994 година, беше претседател на БФУ од 2005 година, кога го замени Иван Славков, кој беше исфрлен од Интернационалниот олимписки комитет (ИОЦ) поради обвиненија за корупција.

Се јави и бугарскиот премиер Бојко Борисов, инаку голем љубител на фудбалот и повремен фудбалер.

„Оставката си е работа на БФС. Ние нема да се мешаме во работата на фудбалскиот сојуз. Има судии и обвинители кои ќе го водат случајот, а ние само треба да овозможиме помош од државата. Доколку не ги почитуваат законите, местат мечеви или договараат судии за мечеви, тоа не може да се толерира. Полицијата го има својот збор“, изјави Борисов.

Михајлов ја презеде одговорноста, си поднесе оставка