Администрацијата на донеодамнешниот американски претседател Бара Обама во последните часови од должноста префрлила 221 милион долари на Палестинската автономија, на што долго време се противеа претставниците на Републиканската партија во Конгресот, соопштија во понеделникот вечерта извори запознаени со случајот.

Администрацијата на Обама официјално по писмен пат го известила Конгресот за својата намера утрото на 20-ти јануари, неколку часови пред на претседателската должност да стапи Доналд Трамп. Ден претходно, сега поранешниот државен секретар Џон Керим ги известил пратениците за таквата намера на администрацијата, рекол соговорникот на Associated Press.

Покрај префрлените средства на Палестинската самоуправа, администрацијата на Обама издвоила 6 милиони долари за трошоците во областа на надворешната политика, од кои 4 милиони за програмите во областа на климатските промени, 1,25 милиони за потребите на организациите под покровителство на ОН, како и 1,05 милиони долари за финансирање на специјалниот претставник на Стејт департментот за Авганистан и Пакистан, како и на Бирото за Јужна и Централна Азија.

Одлуката на поранешната претседателска администрација водена од демократите може да предизвика остра негативна реакција на некои членови на Конгресот, во кој републиканците имаат мнозинство, како и од самиот нов претседател Доналд Трамп, исто така, од Републиканската партија, истакнува агенцијата.

Во предизборната кампања Трамп вети дека ќе ги подобри односите меѓу САД и Израел, кои според општата оцена беа значително нарушени, меѓу другото и поради личната нетрпеливост меѓу поранешниот демократски претседател Барак Обама и израелскиот премиер Бенјамин Нетанјаху.

Спротиставеностите кулминираа кога кон крајот на декември 2016 година, Советот за безбедност на ОН донесе резолуција за израелските доселенички населби во палестинската енклава Западен брег, а таа била формулирана и иницирана од страна на американскиот претседател тогаш на заминување Барак Обама, обвини израелскиот премиер Бенјамин Нетанјаху.

Советот за безбедност на ОН усвои резолуција со која се осудува израелското населување на териториите коишто меѓународната заедница ги смета за палестински окупирани од Израел по војната од 1967 година и се повикува Израел да престане со таквата практика. За резолуцијата гласаа 14 држави постојани непостојани членки, а САД, кои се израелски стратешки сојузник и имаат право на вето, беа воздржани со што го овозможија всушност носењето на резолуцијата.

Ова е првата резолуција од 1979 година со којашто се осудува израелското населување на палестинските територии во Советот за безбедност, која е усвоена откако традиционалниот израелски сојузника САД сосема неочекувано и првпат не го искористија правото на вето, и со воздржаноста всушност го овозможија носењето на резолуцијата.

Тоа предизвика нов излив на гнев во Израел кон Вашингтон и повторно затегнување на односите со кои беше исполнет особено вториот мандат на американскиот претседател на заминување Барак Обама.

Новиот републикански претседател веќе го покани Нетанјаху да ја посети Белата куќа уште во февруари, а исто така навести дека се размислува да ја пресели амбасадата на САД од Тел Авив во Ерусалим, што, пак, може да предизвика реакција од арапските американски сојузници./крај/мф/сн
/