Земјите од Источна Африка се борат со инвазија на пустински скакулци кои стануваат закана за прехраната на населението, соопшти во петокот работната група на меѓународни организации кои се бават со безбедност на храната (FSNWG).

Инвазијата, за која Организацијата за храна и земјоделство на ОН (ФАО) вели дека е најлоша во последните 25 години, може да доведе до ширење на глад, ако не биде итно спречена.

Регионот на Источна Африка, кој е исцрпен од суши, поплави и конфликти, веќе доживува високи нивоа на недостаток од храна, па така 19 милиони луѓе се на работ на глад.

Инвазијата на скакулци кои летаат во огромни роеви значително ќе ја влоши ситуацијата, соопшти FSNWG.

Пустинскиот скакулец е еден од најопасните номадски инсекти во светот, а рој од еден квадратен километар може да изеде храна со која би се прехраниле 35.000 луѓе за еден ден, предупреди Канцеларијата на ОН за координација на хуманитарната помош (ОХА).

ФАО проценува дека еден рој од 2.400 квадратни километри во Кенија може да содржи над 200 милијарди скакулци, од кои секој во текот на денот јаде храна колку својата големина (два грама), што на крајот изнесува 400.000 тони храна секој ден.

Доналд Трамп денеска стана првиот американски претседател кој во текот на мандатот присуствувал на Маршот за живот, нарекувајќи се себеси лојален поддржувач на движењето.

„Неродените деца никогаш немале посилен заштитник во Белата куќа“, рече Трамп во говорот одбележан со многу верски референци, кој го одржа во центарот на Вашингтон.

„Секое дете е непроценлив и свет дар од Бога“, додаде тој.

Маршот за живот се одржува од 70-тите години на минатиот век, но ниту еден претседател не учествувал на него сè додека Трамп не дојде на функцијата.

Прашањето за абортусот е меѓу оние кои внесуваат најголем раздор во американското општество. Правото на абортус е заштитено со одлука на Врховниот суд од 1973 година, со која се легализира прекинувањето на бременоста.

Конзервативците во САД и покрај оваа одлука се обидуваат да ги ограничат абортусите на ниво на сојузните држави и преку намалување на федералното финансирање на клиниките.

Вклучувањето на Трамп во овој марш доаѓа во година кога во САД ќе се одржуваат претседателски избори на кои тој ќе се бори за втор мандат и во време кога американскиот Сенат расправа за негово отповикување.

„Сакаат да ме отстранат затоа што јас се борам за вас и ние се бориме за оние кои немаат глас, но ќе победиме затоа што знаеме како да го сториме тоа“, изјави тој во обраќањето пред присутните на маршот.

Силен земјотрес со јачина од 6,9 степени го погоди денес источниот дел на Турција. Тлото се тресело во округот Сиврице, во провинција Елазиг, околу 20:55 часoт по локално време (18:55 пo средноевропско), објави владината агенција за катастрофи.

Турските власти соопштија дека четири лица загинале, пренесе агенцијата АФП.

Некои жители на овој регион на страниците на Евромедитеранскиот сеизмолошки центар напишаа дека темелите на нивните домови силно се занишале. Други напишаа дека делови од нивните куќи се оштетени, пренесува хрватски „Индекс“.

Локалните медиуми објавија дека се срушиле и неколку станбени згради, а на интернет се појавија и првите снимки по потресот.

Турскиот министер за внатрешни работи Сулејман Сојлу пред новинарите изјави: „Сиврице е сериозно погоден, спасувачките екипи се на пат“.

Тој рече дека во оваа област се урнале повеќе згради.

Поради местоположбата на земјата, земјотресите не се невообичаени на територијата на Турција. Во 1999 година, во земјотрес со јачина од 7,6 степени загинаа повеќе од 17.000 луѓе.