Свет
Американски дипломат 14 години дрогирал и силувал жени, му се заканува доживотен затвор
Поранешен службеник на американската амбасада во Мексико се изјасни за виновен за дрогирање и сексуална злоупотреба на најмалку 23 жени во текот на изминатата деценија, пишува „Њујорк пост“.
Брајан Џефри Рејмонд од Ла Меса се изјасни за виновен по обвиненијата за сексуална злоупотреба и дистрибуција на непристоен материјал, се наведува во соопштението од Министерството за правда.
45-годишниот Рејмонд го напушти Мексико откога една жена беше пронајдена гола и бараше помош од неговата тераса на 31 мај 2020 година, според судските документи. Таа рече дека не се сеќава на настанот по замањето на пијалаците и храната што тој ѝ ги донел, пренесуваат агенциите.
За време на истрагата што следуваше агентите пронашле стотици фотографии и видеа на кои се прикажани повеќе од 20 несвесни голи или делумно голи жени на мобилните телефони на Рејмонд, се вели во соопштението.
„Раката на Рејмонд е видлива на фотографиите и видеата, како и устата, очите, рацете и нозете на неговите жртви. На тие фотографии тој ги гали по градите и задникот. Исто така, се гледа дека Рејмонд лежи во кревет со жени што се во несвест“, се наведува во соопштението.
„Жртвите се соочувале со губење на меморијата за време на престојот кај Рејмонд и не знаеле за фотографиите, видеата и физичкиот контакт“, велат официјалните лица.
За време на истрагата, ФБИ утврдила дека Рејмонд пребарувал на интернет-страници поврзани со ефектите од употребата на дрога и алкохол.
Во спогодбата за вина Рејмонд признал дека имал сексуални односи со две жртви во својата резиденција во Мексико Сити. Тој посочил и дека жртвите не биле во можност да му дадат согласност.
Тој исто така признал дека во текот на 14 години фотографирал најмалку 20 жени и дека ги допирал нивните интимни делови од телото.
Се соочува со максимална казна доживотен затвор, соопштија надлежните.
„Брајан Рејмонд ја изневери довербата што му беше укажана како вработен во американската влада бидејќи со години ги злоупотребува, експлоатира и ги снимаше жените што ги таргетира во Соединетите Американски Држави и други делови на светот“, изјави помошникот на државниот обвинител, пренесуваат агенциите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Ердоган по повод Денот на Европа: Односот на некои земји кон кризата во Газа ја разниша вербата во европските вредности
Претседателот на Турција, Реџеп Таип Ердоган, објави порака по повод Денот на Европа, во која посочи дека политиката што ја спроведуваат некои европски институции и земји во контекст на кризата во Газа ја разнишаа вербата во европските вредности.
Ердоган изјави дека 9 мај, кога беше објавена декларацијата на Шуман, со која беа поставени темелите на европската интеграција, во Турција се доживува како Ден на Европа од 1999 година кога Анкара го доби статусот на кандидат за членство во Европската Унија.
„Денот на Европа, 9 Мај, не само што го означува почетокот на политичкото и економското единство на Европа туку ги означува и мирот и стабилноста, кои се плод на децениските заеднички напори“, посочи тој.
Свет
ОН: 109 Палестинци убиени, 296 ранети во Појасот Газа од понеделник до среда
Најмалку 109 Палестинци беа убиени, а 296 ранети во израелските напади врз Појасот Газа од понеделник до среда попладне, вклучително и жени и деца што беа убиени во нападите на станбени куќи во Рафа, соопшти канцеларијата на Обединетите нации за координација на хуманитарните прашања (УНОЧА) врз основа на податоците добиени од Министерството за здравство во Газа контролирано од Хамас.
УНОЧА соопшти дека 32 лица биле убиени во шест израелски напади врз Рафа, меѓу кои 11 деца и осум жени.
Девет лица, меѓу кои четири деца и две жени, загинаа во израелски напад врз бегалски камп југоисточно од Рафа.
Девет лица загинаа во нападот во источна Рафа, меѓу кои четири деца и три жени.
Две деца и две жени загинаа кога беше погодена нивната куќа во источниот дел на Раф.
Пет лица, меѓу кои една жена и едно дете, загинаа во израелски напад врз куќа во западна Рафа.
Според УНОЧА, во два одделни напада на истокот и западот на Рафа загинаа уште пет лица, пренесе „Ал џезира“.
Свет
Евровизија 2024: Публиката ја исвирка израелската претставничка Еден Голан на пробата пред полуфиналето
Израелската претставничка на Евровизија изјави дека „ништо нема да ја спречи“ откога беше исвиркана за време на пробата во средата.
Еден Голан ја испеа песната „Ураган“ пред полуфиналето в четврток во Малме, Шведска.
Таа во изјавата наведе дека е „се гордее што ја претставува сопствената земја“.
Досега имаше неколку иницијативи за забрана на Израел да настапи на годинешниот натпревар поради војната во Појасот Газа, која трае од октомври.
Сепак, Европската радиодифузна унија (ЕБУ), организатор на Изборот за песна на Евровизија, одлучи дека Израел може да се натпреварува.
По пробата во средата, на социјалните мрежи се појавија голем број видеа направени од гледачи во публиката, на кои се гледа како поединци од толпата ја исвиркуваат израелската претставничка.
Израел во моментот спроведува воена операција во Газа, која ја почна како одговор на прекуграничниот напад на Хамас врз јужен Израел на 7 октомври. Тогаш беа убиени околу 1.200 луѓе, а 252 беа киднапирани.
Оттогаш повеќе од 34.840 луѓе се убиени во Појасот Газа, според Министерството за здравство на Хамас.
Израел, заедно со други неевропски земји како Азербејџан, Грузија и Австралија, може да се натпреварува како членка на ЕБУ.
Жан-Филип де Тендер, заменик-генерален директор на ЕБУ, во средата рече дека ако го исклучите израелскиот јавен сервис од натпреварот, тоа ќе биде политичка одлука, која како таква не може да ја донесат бидејќи ЕБУ е аполитична организација.
„Ги разбираме загриженоста и силните ставови што многумина ги имаат за војната на Блискиот Исток. Мислам дека никој не може да остане имун на длабокото страдање на сите што се во војна“, додаде тој.
Од Еден Голан беше побарано да ја смени оригиналната песна со наслов „Октомвриски дожд“ откога таа предизвика контроверзии.
Се сметаше дека песната алудира на убиствата и киднапирањата на Израелците од Хамас, па затоа е сменета во „Ураган“, што ЕБУ го одобри.
Од тимот на пејачката изјавиле дека 20-годишната Голан не ја напушта хотелската соба бидејќи израелската делегација добила низа закани.
Организаторите се извинија затоа што еден учесник во полуфиналето покажа пропалестински симбол во вторникот.
Ерик Саде од Шведска, кој настапи во воведниот ревијален дел од шоуто, носеше кефије околу зглобот – вид шал што луѓето го користат за да покажат дека се пропалестински настроени.
„Евровизија е ТВ-шоу во живо. Сите изведувачи се запознаени со правилата на натпреварот и жалиме што Ерик Сад реши да ја загрози неполитичката природа на настанот“, рече портпаролката на ЕБУ, организатор на настанот.
Пред натпреварот во „Малме арената“ гледачите беа предупредени да не носат палестински знамиња и други симболи.
Ирската пејачка Бамби Таг им кажа на новинарите дека добиле „наредба“ да ги отстранат сите политички пораки од облеката што планирале да ја носат во полуфиналето.
Тие замислиле делови од својата облека на сцената да бидат стилизирани во древното келтско писмо на зборот огам – за кој велат дека може да се толкува како „примирје“ и „слобода за Палестина“.
Оли Александар, кој ја претставува Велика Британија, претходно повика на „непосреден и траен“ прекин на огнот во Газа, но ги отфрли повиците за бојкот на натпреварот.