Свет
Борел: ЕУ планира да и испрати на Украина помош од 21 милијарда евра во 2024 година
Земјите од ЕУ планираат оваа година да издвојат најмалку 21 милијарда евра за воена помош за Украина, додека во првите две години оваа помош изнесуваше 28 милијарди евра, изјави денеска шефот на европската дипломатија Жозеп Борел.
На прес-конференција, по неформалниот состанок на министрите за одбрана во Брисел, Борел рече дека ЕУ очекува да достигне 52 отсто од целта да испрати еден милион гранати во Украина до март оваа година.
Тој додаде дека капацитетот за производство на артилериски гранати во Европа до крајот на годината ќе достигне 1,4 милиони годишно, додека сега е речиси милион.
Борел рече дека денеска е постигнат договор за обука на уште 20.000 украински војници.
„Речиси ја достигнавме целта од 40.000 обучени украински војници преку нашата мисија за обука во Украина“, рече Борел, додавајќи дека вкупно 60.000 војници ќе бидат обучени до лето.
Борел посочи дека минатата година ЕУ и нејзините земји-членки се обврзаа да испорачаат еден милион артилериски куршуми во рок од една година, а дека од март минатата година се испорачани 330.000 артилериски куршуми.
Тој додаде дека очекува таа бројка да се зголеми за 200.000 и до март да достигне 524.000, што е 52 отсто од зацртаната цел.
„До крајот на годината планираната испорака ќе достигне повеќе од еден милион“, нагласи Борел.
Тој додаде дека капацитетот за производство е зголемен за 40 отсто од почетокот на војната.
„Капацитетот за производство на муниција денес изнесува речиси еден милион куршуми годишно, но до крајот на годината ќе достигне 1,4 милиони. Ќе продолжи да се зголемува“, рече Борел.
Тој посочи дека за време на средбата ја повторил итноста за постигнување договор за натамошна воена поддршка за Украина, како на краток, така и на долг рок.
Борел изјави дека министрите за состојбата на бојното поле, за потребите и приоритетите на Украина ги информирал украинскиот министер за одбрана Рустем Умеров, кој учествувал преку видео повик. Тој додаде дека дискусијата за Фондот за помош за Украина продолжува, пред утрешниот Европски совет, кој ќе се занимава со најитните потреби на Украина.
Борел истакна дека разговарале и за европската одбранбена индустриска стратегија и како да се зголеми индустриската и технолошката основа на одбраната на ЕУ, а истовремено да се зголемат индустриските капацитети, пренесува Танјуг.
„Мораме да преминеме од итен режим на поддршка за Украина кон долгорочен пристап за зајакнување на нашата одбранбена индустрија“, рече Борел, додавајќи дека земјите-членки се силно посветени на таа стратегија, која ќе биде претставена прво пред Европската комисија а потоа до Советот на ЕУ.
Белгискиот министер за одбрана Лудивин Дедондер на заедничката прес-конференција со Борел рече дека ЕУ е таму за да обезбеди опрема што е неопходна за непосредна одбрана на украинската територија и народ, но и дека таа е таму за да му помогне на Киев да ги модернизира сопствените вооружени сили, за да може кога ќе заврши војната да продолжи да ја брани својата територија.
Посочувајќи ги бројките што ги изнесе Борел кога станува збор за помошта за Украина на краток и долг рок, таа оцени дека тие зборуваат за посветеноста на ЕУ во поддршката на Украина.
„Бројките не лажат“, рече таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Маск подготвен да биде домаќин на изборната дебата на претседателските кандидати во САД
Американскиот претприемач и милијардер Илон Маск денеска објави подготвеност да биде домаќин на изборната дебата на кандидатите за претседател на САД, која се очекува да се одржи меѓу сегашниот и поранешниот американски претседател Џозеф Бајден и Доналд Трамп, со учество на независниот кандидат Роберт Кенеди Џуниор.
„Се разбира“, напиша Маск на својот профил на социјалната мрежа X, одговарајќи на прашањето на Кенеди дали тој ќе биде домаќин на дебатата.
Маск рече и дека смета оти во предизборните дебати треба да учествува независниот претседателски кандидат на изборите во САД, Роберт Кенеди Џуниор.
Свет
Руски беспилотни летала гаѓаа украинска енергетска инфраструктура, делови од земјата без електрична енергија
Руски беспилотни летала погодија електрани рано утринава, прекинувајќи ја струјата во некои делови од областа Суми во северна Украина, соопштија властите.
Во објава на комуникациската платформа Телеграм, регионалните власти соопштија дека беспилотните летала ги погодиле градовите Шостка и Конотоп, североисточно од Киев и во близина на границата со Русија. Воздухопловните сили на Украина соборија седум беспилотни летала користени во нападот, соопштија регионалните власти.
Украинската војска соопшти дека соборила 24 беспилотни летала лансирани од Русија во напад во текот на ноќта врз пет други региони на југот и на истокот на земјата.
Службите за итни случаи работат на враќање на струјата во три окрузи.
Пред нешто повеќе од една недела, руските сили ја преминаа границата и почнаа да навлегуваат во североисточниот регион Харков, а властите предупредија на трупање војници и можен напад врз соседниот регион Суми.
Европа
Норвешка ја призна палестинската држава
Владата на Норвешка денеска соопшти дека нордиската земја признава независна палестинска држава.
Норвешкиот премиер Јонас Гар Стор денеска изјави дека скандинавската земја донела одлука официјално да ја признае Палестина како држава.
Одлуката стапува на сила на 28 мај, објави АП.
„Не може да има мир на Блискиот Исток доколку не дојде до признавање“, рече норвешкиот премиер, додавајќи дека „Палестина има основно право на независна држава“.
Неколку земји од Европската унија во последните недели дадоа индикации дека планираат да ја признаат Палестина, бидејќи сметаат дека решението со две држави е клучно за траен мир во тој регион.
Норвешка, која не е членка на Европската унија, но најмногу ги следи одлуките на Брисел, долго време го поддржува решението со две држави, Израел и Палестина.